UBUNGO YAPOKEA MAGARI MAWILI KWA AJILI YA SEKTA YA AFYA

Posted on: February 10th, 2024

Majimbo mawili ya kiuchaguzi ya Manispaa ya Ubungo likiwemo Jimbo la Ubungo na Jimbo la Kibamba ni miongoni mwa majimbo 264 Nchini yaliyopata gari la huduma za dharula ‘ambulance’ pamoja na gari la usimamizi wa vituo vya afya kutoka Serikali kuu kupitia kupitia mpango maalum wa usimamizi wa huduma za dharula za afya kwa kila Jimbo la uchaguzi.

Katika zoezi la mapokezi ya magari hayo  tarehe 10/02/2024 Manispaa ya Ubungo kupitia Hospitali ya Wilaya hiyo imeandaa hafla ya mapokezi hayo ambapo viongozi na wananchi mbalimbali wamehudhuria na kujionea mazuri yanayoendelea kufanywa na Mhe. Rais wa awamu ya sita Dkt. Samia Suluhu Hassan.

Akiongea wakati wa kukabidhi magari hayo Mhe. Kitila Mkumbo Mbunge wa Jimbo la Ubungo na Waziri wa Nchi ofisi ya Rais mipango na uwekezaji amewataka watoa huduma za afya ndani ya Wilaya hiyo kutoa huduma stahiki na zinazolizisha kwa wananchi kwani Serikali imeendelea kuboresha sekta ya afya Nchini kwa maslahi ya wananchi.

Sambamba na hayo Mhe. Kitila amewataka watoa huduma hao kuhakikisha magari hayo yanatunzwa na kutumika kwa matumizi kusudiwa kwa lengo la kuwezesha utoaji bora wa huduma za afya kwa wananchi.

“Ni wazi kuwa Wilaya ya Ubungo ina vituo vingi vya kutolea huduma za afya hivyo uwepo wa magari haya unaenda kurahisisha utoaji wa huduma za afya hususani huduma za dharula na kupelekea kutatua changamoto mbalimbali za ujauzito na hali za magonjwa ya Watoto ambazo mara nyingi zinapelekea uhitaji wa rufaa na matibabu” aliongeza Mhe. Kitila.

Akishukuru baada ya mapokezi ya magari hayo Ndg. Elias Runeye Ntiruhungwa Mkurugenzi wa Manispaa hiyo amesema anamshukuru Mhe. Rais kwa kuendelea kuboresha Sekta ya afya Nchini kitendo ambacho kinaongeza faraja na matumaini kwa wananchi pindi wanahitaji kupata huduma za afya.

Kwa upande wake Mganga Mkuu wa Wilaya hiyo Dr. Tulitweni Mwinuka amesema Manispaa hiyo inajumla ya vituo 275 vya kutolea huduma za afya huku vituo 24 vikiwa vya Umma na 251 ni vituo binafsi ambavyo vina jumla ya magari 10 ya dharula ya wagonjwa kati ya hayo mawili ni ya Umma na  nane ni magari ya vituo binafsi.