UBUNGO YAPONGEZWA KWA UKUSANYAJI WA MAPATO ROBO YA NNE 2022/2023.

Posted on: August 11th, 2023

Baraza la Madiwani Manispaa ya Ubungo limeipongeza Manispaa hiyo kwa kusimamia ukusanyaji wa mapato na kupelekea mapato hayo kuongezeka kwa kipindi cha robo ya nne ya 2022/2023.

Pongezi hizo zimetolewa kwenye baraza la kawaida la Manispaa hiyo lililofanyika  tarehe 11/08/2023 ndani ya Ukumbi wa Manispaa hiyo wakati wakati Madiwani hao wakichangia hoja baada ya uwasilishwaji wa taarifa ya Kamati ya Fedha na Utawala iliyowasilishwa na Mhe. Ismail Mvungi mjumbe wa kamati hiyo kwa niaba ya Mwenyekiti wa Kamati Mhe. Juma Jafary Nyaigesha.

Akisoma taarifa ya mapato ya Manispaa hiyo kwa robo ya nne ya mwaka 2022/2023 Mhe. Mvungi ameeleza kuwa Manispaa imefanikiwa kukusanya mapato kwa asilimia 132% ambayo ni zaidi ya lengo la makisio.

Mhe. Mvungi ameendelea kueleza kuwa kwa lengo la kuongeza mapato Manispaa hiyo imeunda Kamati ya kushauri vyanzo vipya vya mapato vinavyoweza kukusanywa na Manispaa hiyo.

Kwa upande wake Mhe. Juma Jafary Nyaigesha Mstahiki Meya wa Manispaa hiyo amewataka watumishi wa Manispaa hiyo kuendelea kuongeza kasi juu ya ukusanyaji wa mapato na kusimamia miradi mbalimbali inayotekelezwa na Manispaa hiyo.

Nae Mkuu wa Wilaya hiyo Mhe. Hashim Komba ameitaka Manispaa hiyo kuandaa kikao maalumu kitakachojumuisha Kamati ya Ulinzi, wataalamu na wadau mbalimbali kwa lengo la kujadili na kupitia vyanzo vyote vya mapato yanayokusanywa na Manispaa hiyo sambamba na kuweka mikakati madhubuti ya kudhibiti mapato hayo.