UBUNGO YAPONGEZWA KWA USIMAMIZI MZURI WA UJENZI WA SHULE MAALUM YA WASICHANA YA MKOA WA DAR ES SALAAM.

Posted on: September 10th, 2024

Kamati ya Kudumu ya Bunge ya Elimu,Tamaduni na Michezo mapema tarehe 10/9/2024  imetembelea Shule Maalum ya Wasichana ya Mkoa wa Dar es Salaam na kuipongeza Manispaa ya Ubungo kwa kusimamia vizuri ujenzi wa shule hiyo iliyojengwa katika kata ya kwembe mtaa wa Njeteni inayogharimu kiasi cha shilingi bilioni 5,816,504,136.00  na ina jumla ya wanafunzi 499 kuanzia kidato cha 1 mpaka kidato cha VI ambao mpaka sasa  wanaendelea na masomo shuleni hapo

Wakiwa shuleni hapo Wajumbe wa kamati hiyo wamempongeza Mkurugenzi na Baraza la madiwani kwa kuhakikisha imesimamia mradi huo kuwa bora na kuzingatia mazingira safi na salama kwaajili ya wanafunzi ikiwemo ujenzi wa uzio unaosadia ulinzi kwa wanafunzi katika shule hiyo

Aidha, Mjumbe wa kamati hiyo ambaye pia ni Naibu Waziri wa Elimu, sayansi na Teknolojia  Mhe. Omari Kipanga amemshukuru Rais wa Jamhuri ya Muungano wa Tanzania kwa kuwezesha fedha hizo ambazo zimeenda kuleta manufaa makubwa kwa Taifa na Ubungo imeenda kujivunia uwepo wa shule ya mkoa ya wasichana iliyojengwa kutokana na fedha za Sequip.

Nae, Makamu mwenyekiti wa kamati hiyo Musa Sima amempongeza Mkurugenzi kwa kutoa kiasi cha shilingi bilioni 1,365,504,136.00 kutoka katika mapato ya ndani kwaajili ya umaliziaji wa miundombinu mbalimbali katika shule hiyo

Akisoma taarifa ya mradi huo wa shule ya wasichana Mkoa wa Dar es salaam Mkuu wa Idara ya elimu Sekondari Ndg.Vosta Mgina amesema kuwa shule hiyo imejengwa kwa gharama ya shilingi bilioni 5,816,504,136 ambayo ujenzi wake ulianza mnamo tarehe 8 julai, 2022 na ujenzi wa awamu ya kwanza ulipokamilika na kuanza kutumika rasmi mwezi 8 mwaka 2023 na kueleza kuwa usajili wa shule hiyo tayari umekamilika.

Vosta, aliendelea kueleza kuwa Shule hiyo inaanzia kidato cha kwanza mpaka kidato cha sita na ina jumla ya wanafunzi  499  ambapo kati yao kidato cha I ni 176 na kidato cha tano wanafunzi 191 na kidato cha sita ni 133 ambao wapo kwa sasa na inatarajia kupokea wanafunzi wapatao 1000 kila mwaka baada ya ujenzi wa miundombinu yote kukamilika