UBUNGO YATOA EKARI 12 KISOPWA KWA AJILI YA UJENZI WA MIUNDOMBINU YA MAJI TAKA.

Posted on: May 13th, 2023

Halmashauri ya Manispaa ya Ubungo imetenga eneo lenye ukubwa wa ekari 12 kwa ajili ya utekelezaji wa ujenzi wa mradi wa kuchakata maji taka unaotekelezwa na DAWASA.

Akiongea katika kikao kilichofanyika leo tarehe 13 Mei, 2023 Kaimu Mkurugenzi wa Manispaa hiyo Ndg. Fadhili Husein amesema katika utekelezaji wa miradi mbalimbali inayotekelezwa na DAWASA ndani ya Manispaa hiyo, Manispaa ya Ubungo ilipata jukumu la kutoa maeneo ambayo miradi hiyo itatekelezwa.

Ikiwemo mradi wa ujenzi wa vyoo vya Umma kwenye maeneo yenye mikusanyiko ya watu wengi, mradi wa ujenzi wa kuchakata maji taka na mradi wa ujenzi wa mifumo rahisi ya kuondoa maji taka majumbani.

Kwa upande wake Mhandisi wa DAWASA Eng. Gilbert M. Rugaitika amesema miradi hiyo itatekelezwa kwa Halmashauri zote za Dar es Salaam ambapo kwa Ubungo mradi wa uchakataji wa maji taka utatekelezwa eneo la Kisopwa ambapo Manispaa ya Ubungo imetoa eneo lenye ukubwa wa Ekari 12 na tayari Mkandarasi amepatikana na ujenzi utaanza hivi karibuni.

Eng. Rugaitika ameendelea kueleza kuwa mradi wa ujenzi wa vyoo vya Umma kwa Manispaa ya Ubungo vyoo hivyo vimejengwa kwenye maeneo mbalimbali ikiwemo Hospitali ya Mloganzila, Soko la Mbezi, Soko la Manzese, Soko la Shekilango, External Makuburi na stendi ya Simu 2000 ambapo vyoo hivyo vimekamilika kwa asilimia 75 na ujenzi wake utakamilika kufikia mwezi Juni, 2023.

Aidha, Eng. Rugaitika amesema kutokana na uwepo wa water table kuwa juu kwa maeneo mengi ya Dar es Salaam ambayo inapelekea wananchi kushindwa kuchimba mashimo ya kuhifadhi maji taka, hivyo DAWASA imekuja na mpango wa mradi wa ujenzi wa mifumo rahisi ya kuondoa maji taka majumbani ambao itaanza utekelezaji wa mradi huo kwenye maeneo ambayo yameathirika kwa kiasi kikubwa.

Nae Mstahiki Meya wa Manispaa hiyo Mhe. Juma Jafarry Nyaigesha amewashukuru DAWASA kwa utekelezaji wa miradi hii muhimu ambayo kwa kiasi kikubwa itaenda kutatua changamoto za wananchi zinazotokana na maji taka kwenye maeneo yao na kuahidi kutoa ushirikiano madhubuti baina yao na DAWASA.