UBUNGO,TANESCO NA SONGAS WAPEWA SIKU TANO NA DC KOMBA

Posted on: October 18th, 2023

Kufuatia mgogoro wa ardhi uliopo mtaa wa Kinzudi kata ya Goba, Mkuu wa Wilaya ya Ubungo Mhe. Hashimu Komba ametoa siku tano kwa  Manispaa ya ubungo kwa kushirikiaana na Shirika la Umeme Tanzania (TANESCO) na SONGAS kutambua mipaka ya eneo la wazi lililokuwa linatumiwa na TANESCO baada ya kupewa na SONGAS inayodaiwa kumiliki eneo hilo.

Mhe.Komba amefikia maamuzi ya kutaka mipaka ya eneo hilo kutambuliwa na kuwekwa alama  baada ya kuzuka mgogoro baina ya wananchi wanaotumia sehemu ya  eneo hilo kuzikana na baadhi ya watu wanaosadikika kujimilikisha vipande vya ardhi katika eneo hilo kinyume na sheria.

Mhe Komba amesema "Baada ya kutambua mipaka ya eneo na kuweka alama wale ambao nyumba zao zitakuwa ndani ya eneo la wazi wataulizwa walipatapataje umiliki wa maeneo yao, tutaanzia hapo"

Kutokana na hali hiyo Mhe. Komba amewaomba wananchi kutofanya maendelezo yoyote ya kujenga au kupanda miti katika eneo hilo mpaka mgogoro huo utakapotatuliwa ambapo ameahidi kuwa katika mgogoro huo serikali itatetea maslahi ya wananchi na sio watu wachache wanaokiuka sheria.

Aidha,Mhe Komba amewaomba wananchi wa kinzudi  kutotawanya makaburi katika eneo hilo kwa lengo la kulilinda badala  yake watumie eneo la awali kwa ajili ya mazishi mpaka pale mgogoro utakapo tatuliwa.

Kutokana na mgogoro huu wa ardhi hasa maeneo ya wazi, Mkuu wa Wilaya ameagiza kupata ripoti ya kamati ya maeneo ya wazi na mpango wa kudhibiti uvamizi wa maeneo hayo ndani ya Wilaya hiyo kwa ajili ya kufanya ufuatiliaji.

Akiongea mbele ya Mkuu wa Wilaya huyo, mmoja wa wananchi amesema kumekuwa na uvamizi wa eneo hilo la wazi  ambapo baadhi ya watu wamejimilikisha na kujenga makazi lakini kinachoumiza hawazuiliwi ila wananchi wakitaka kuzikana wanazuiliwa.

Mkuu wa Wilaya ya Ubungo Mhe. Hashim Komba akiwa na Mwatalaam kutoka Manispaa ya Ubungo na wananchi wa kinzudi katika utatuzi wa mgogoro uliopo Kata ya Goba Mtaa wa kinzudi