UHARIBIFU WA MAZINGIRA UBUNGO SASA BASI

Posted on: September 8th, 2022

Manispaa ya Ubungo Leo 08/09/2022 imefanya kikao cha kujadili suala la uchimbaji holela wa mchanga kilichojumuisha wataalamu toka Bonde la Wami/Ruvu, NEMC, Afisa Mazingira, Waheshimiwa Madiwani, Wenyeviti na Watendaji wa Kata na Mitaa Manispaa ya Ubungo lengo ikiwa ni kudhibiti uharibifu wa mazingira.
Akiongea kwenye kikao kazi hicho Dkt. Elizabeth Mshote Mwenyekiti kikosi kazi Mkoa wa Dar es Salaam ameeleza sheria ya usimamizi wa rasilimali za maji Na. 11 ya mwaka 2009 inazitaka Bodi za maji za mabonde nchini Tanzania Bara kusimamia na kuratibu shughuli zote zinazofanyika ndani ya hifadhi za vyanzo vya maji kama vile mito, mabonde, maeneo oevu, maziwa, chemchemi na mabwawa.

Mshote ameendelea kueleza kutokana na uchimbaji holela wa mchanga katika mito na mabonde na kwakuwa kumekuwa na uhitaji mkubwa wa mchanga ambao unatumika kwa ajili ya kujengea miundombinu mbalimbali yakiwemo majengo ya Umma na binafsi na miradi mingine kumekuwa na uharibifu mkubwa wa mazingira hasa kwenye mito na mabonde.
 
Kwa upande wake Mkuu wa Wilaya ya Ubungo Mhe. Kheri James amewataka watendaji wa Kata na Mitaa pamoja na Wenyeviti wa Mitaa kuhakikisha wanadhibiti na kuyalinda mazingira juu ya uchimbaji holela wa mchanga.
Aidha, James amesema kuanzia ngazi ya Halmashauri, NEMC, Bonde Wami, Viongozi wa Kata na Mitaa kila mmoja anawajibu wa kufanya juu ya udhibiti wa mazingira.
James amewataka watu kuacha tabia ya kuchimba mchanga kiholela kwani kufanya hivyo kunapelekea uharibifu wa mazingira tena unaopelekea kupoteza makazi ya watu. Na amesema mtu yeyote atakayefanya hivyo atachukuliwa hatua za kisheria na kama ni kampuni basi itafungiwa.

Mbali na hayo James amelitaka jeshi la polisi kuhakikisha watu hao wanashughulikiwa kwa mujibu wa sheria kwani kosa la uharibifu wa mazingira ni sawa na makosa mengine ya uvunjifu wa sheria.

“Tusipoipambania vizuri vita ya udhibiti wa mazingira vita zingine zitatushinda. Hakuna uchumi bila mazingira, hakuna utalii bila mazingira, hakuna diplomasia bila mazingira, hakuna siasa bila mazingira lindeni mazingira” Alisema James.