UJENZI WA MADARASA 8, MADAWATI 300 KUPUNGUZA KERO YA WANAFUNZI KUKAA CHINI KING'ONGO

Posted on: January 18th, 2021

Kufuatia upungufu wa madarasa  na madawati katika shule ya Msingi Kingo'ngo iliyopo  kata ya Saranga Manispaa ya Ubungo unaopelekea wanafunzi wengi kukaa chini, Manispaa itaanza mara moja  ujenzi wa vyumba 8   vya madarasa na kutengeneza madawati 300 kwa gharama ya shilingi milioni 160 ikiwa ni hatua ya kutatua changamoto hiyo.

 Shule hiyo yenye wanafunzi 2505, kwa sasa ina madarasa 10 Kati ya hayo madarasa 3 ni mabovu ambapo kutokana na uchache huo wanafunzi wengi wanakaa chini na wengine wanasomea nje.

Manispaa imefikia uamuzi wa kujenga miundombinu hiyo ikiwa ni utekelezaji wa agizo la Mhe. Rais  Dkt John Pombe Magufuli   alilolitoa leo Januari 18, 2021 akiwa Mjini bukoba  la kutaka madarasa yajengwe na kutengeneza madawati kwa haraka ili wanafunzi wasikae chini wala kusomea nje 

Mhe Rais ametoa agizo hilo  kufuatia taarifa iliyotolewa na mwananchi na kusambazwa kwenye mitandao wa kijamii ikionesha wanafunzi  wengi wakisoma  darasa moja wakiwa wamekaa chini na uwepo wa baadhi ya  madarasa mabovu.

Akiongea na wananchi wa king'ongo  Mkuu wa Wilaya ya Ubungo Mhe. Kisare Makori amewahakikishia wananchi hao kuwa ujenzi wa madarasa hayo utaanza mara moja ili kuhakikisha tatizo la wanafunzi kukaa chini linatatuliwa kwa kiasi kikubwa.