UTEKELEZAJI WA TATHMINI YA LISHE UBUNGO KWA KIPINDI CHA JULAI 2022 HADI 2023

Posted on: August 7th, 2023

“Tusichukulie lishe kama kazi badala yake tuichukulie lishe kama shughuli” Alisema Mhe. Hashim Komba Mkuu wa Wilaya ya Ubungo.

Kauli hiyo ameitoa wakati wa kikao cha kujadili taarifa ya tathimini ya mkataba wa lishe kwa kipindi cha Julai 2022 hadi Juni 2023 kilichofanyika katika Ukumbi wa Manispaa ya Ubungo kilichohudhuliwa na Watendaji Kata wa Wilaya hiyo ikiwa ni muendelezo wa utekelezaji wa masuala ya lishe.

Mhe. Komba ameendelea kueleza kuwa lishe ni suala mtambuka na utekelezaji wake unajumuisha wadau mbalimbali wakiwemo wafawidhi wa zahanati na vituo vya afya, wamiliki wa mashine za unga pamoja na wenyeviti wa kamati za Shule na wengine wengi ili kuiwezesha jamii kupata elimu mahususi juu ya umuhimu wa lishe bora hivyo ni vyema shughuli mbambali zifanyike juu ya uhamasishaji wa elimu ya lishe katika jamii.

“Kamati ya lishe msisubiri vikao vya kikanuni pekee, nendeni mkafanye vikao na wadau mbalimbali wa lishe ili kuweza kupata mawazo yao juu ya masuala ya lishe ikiwa pamoja na kutembelea Kata zenye changamoto ya lishe” Alisisitiza Komba.

Aidha, Mhe. Komba amewataka Watendaji wa Kata na Mitaa kusimamia michango inayotolewa na wazazi shuleni ili iwe na uhalisia ambao utawezesha wazazi kuchangia bila shida na hivyo watoto wote wataweza kupata chakula shuleni.

Akiongelea mafanikio yaliyofikiwa kwa kipindi cha Julai 2022 hadi June 2023 Afisa Lishe wa Manispaa hiyo Beatrice Mossile amesema utoaji wa fedha za kutekeleza afua za lishe uliongezeka kwa asilimia  2.84 (86.61%) kulinganisha na mwaka wa fedha Julai 2021 hadi Juni 2022 ambapo utoaji wa fedha ulikuwa kwa asilimia 83.77% na ilifanikiwa kutenga zaidi shilingi 1000 kwa kila mtoto.

Sambamba na hilo Mossile ameeleza kuwa mafunzo yalitolewa kwa wamiliki na walezi 152 wa shule za awali, walimu 76 wa afya Shule zote za Serikali za msingi na sekondari na utoaji wa elimu kwa jamii kuhusu masuala ya umuhimu wa unyonyeshaji maziwa ya mama katika kipindi cha miezi sita ya mwanzo ya uhai wa mtoto na elimu ya kujikinga na magonjwa yasiyoambukiza kwa kuzingatia ulaji unaofaa na kufanya mazoezi.

Afisa lishe Manispaa ya Ubungo Beatrice mossile akitoa elimu kuhusu maswala ya lishe wa wajumbe wa kikao hicho