WADAU WA MAGUFULI WAIOMBA SERIKALI KUTIA MKAZO JUU YA MABASI YASIYOINGIA NDANI YA KITUO HICHO

Posted on: October 28th, 2023

Wadau wa Mabasi yaendayo mikoani na Nchi jirani wa kituo cha Mabasi cha Magufuli  tarehe 28/09/2023 wameomba Serikali kuzuia wamiliki wa mabasi ambao hawatumii Kituo hicho kushusha na kupakia abiria na badala yake wamekuwa wakitumia ofisi zao za nje ya kituo zilizopo maeneo mbalimbali hususani Shekilango na Urafiki na hivyo kupelekea Serikali kupoteza mapato mengi.

Akiongea Ndg. Erick Peter wakala wa Mabasi ya Ngeleja ndani ya kituo hicho amesema Serikali imejenga miundombinu rafiki ya Kituo hicho ili kuiwezesha kupata mapato yatakayosaidia kuboresha huduma mbalimbali lakini imekuwa tofauti kutokana na Mabasi mengi kutoshusha wala kupakia abiria ndani ya Kituo hicho jambo ambalo linapelekea Serikali kupoteza mapato yake.

“Tunaiomba Manispaa ya Ubungo ihakikishe mabasi yote yanaingia ndani ya kituo hicho” alisisitiza Peter.

Kwa upande wake Mkuu wa Wilaya ya Ubungo amesema tayari ofisi yake kwa kushirikina na Ofisi ya Mkurugenzi wa Manispaa hiyo imeanza kuchukua hatua kwa lengo la kuhakikisha Mabasi hayo yanashusha na kupakia abiria ndani ya Kituo hicho.

Hatua hizo ni pamoja na kushirikisha TANROADS, Kiwanda cha Urafiki pamoja na wamiliki wa Mabasi hayo alieleza Komba.

Akisoma taarifa ya kituo hicho Ndg. Isihaka Waziri Meneja wa Kituo hicho kwa Wajumbe wa Kamati ya Siasa na Sekretarieti ya Wilaya ya Ubungo amesema ujenzi wa Kituo hicho hadi sasa umegharimu fedha kiasi cha shilingi Bilioni 49.7 kati ya shilingi bilioni 54.5 zilizotengwa ambazo kati ya hizo Bilioni 50.9 ni fedha kutoka Serikali kuu na Bilioni 3.6 ni fedha za mapato ya ndani ya Manispaa hiyo.

Waziri ameendelea kueleza kuwa utekelezaji wa mradi wa ujenzi wa kituo hicho hadi sasa umekamilika kwa asilimia 97 hivyo maeneo mengine yanaendelea kuboreshwa ikiwemo maeneo ya migahawa, basements, mabenki na ofisi za tiketi.

Kwa mwaka wa fedha 2022/2023 kituo hicho kilikusanya shilingi bilioni 4.4 sawa na asilimia 88 ya makusanyo yaliyopaswa kukusanywa ambayo ni bilioni 5 hii ni kutokana na mabasi kushusha na kupakia nje ya Kituo cha Magufuli na hivyo kuikosesha mapato Manispaa.