WAFANYA BIASHARA UBUNGO WATAKIWA KUFATA BEI ELEKEZI YA SUKARI

Posted on: March 9th, 2024

Aliyekuwa Mkuu wa wilaya Ubungo mhe. Hashimu Abdallah Komba (Kwasasa mkuu wa wilaya ya Geita) amewataka wafanyabiashara wa sukari kuacha tabia ya kuuza sukari kwa bei juu badala yake wazingatie bei elekezi iliyotolewa na serikali ya kati ya shilingi 2700 hadi 3000.

DC Komba ametoa maelekezo  hayo machi 9, 2024 kwenye ziara ya kutembelea na kukagua maduka yaliyopo mtaa wa Msigani eneo la malambamawili na kubaini uwepo wa wafanyabiashara wanaouza sukari kuanzia 3500 hadi 4500 jambo ambalo linaumiza watumiaji (wananchi).

DC Komba amasema "Kamati ya ulinzi na usalama tumeamua kufanya ziara ya kujiridhisha kuona kama bei elekezi ya sukari inazingatiwa kwenye maeneo yetu na tumebaini wapo wafanyabiashara wasiozingatia maelekezo ya serikali, na tumeanza kuchukua hatua"

Serikali ilitoa vibali kwa wafanyabiashara wakubwa kuagiza sukari kutoka nje ya nchi ili kuondokana na changamoto ya upungufu na kupanda kwa bei  ya sukari hasa kwa mtumiaji wa mwisho hivyo ni wajibu wa kila mfanyabiashara kuzingatia bei elekezi.

Aidha, katika ziara hiyo, imebainika kuwa baadhi ya Wauzaji wa kati wa jumla wamejitengenezea bei yao kwa ajili ya kujipatia faida zaidi hali inayopelekea wauzaji wa lejaleja kuuza kwa bei kubwa  na kufanya wananchi kuichukia Serikali kwa kusema maelekezo ya serikali hayatekelezeki.

Kwa upande wake mwenyekiti wa Mtaa wa Msigani Elibariki Mollel amekiri uwepo wa wafanyabiashara wanaouza sukari kwa bei kubwa kutokana na hali hiyo amesema uongozi wa mtaa utaendelea kusimamia maelekezo ya serikali katika uuzaji wa sukari.

Ikumbukwe kuwa Serikali ilitoa vibali kwa waagizaji wakubwa wa sukari kugiza bidhaa hiyo kwa kuondolewa kodi ya thamani lengo ikiwa kuhakikisha mtumiaji wa mwisho anapata sukari kwa bei nafuu.