WAFANYABIASHARA NDOGONDOGO (MACHINGA) WAPEWA ELIMU UMUHIMU WA KITAMBULISHO CHA MJASIRIAMALI

Posted on: August 13th, 2025

Manispaa ya Ubungo kupitia wataalam wa idara ya maendeleo ya jamii wamefanya ziara ya kutembelea masoko yaliyopo katika Wilaya hiyo ambapo tarehe 13 agosti, 2025 wamefika katika Soko la Mabibo, Soko la Big brother na soko la shekilango  na Kutoa elimu kuhusiana umuhimu wa wafanyabiashara wadogo  kuwa na vitambulisho vya wafanyabiashara ndogondogo ili waweze kutambulika.

Akizungumza katika ziara hiyo Mratibu wa wafanyabiashara ndogondogo katika Wilaya ya Ubungo  Bi. Stela Juma amewataka wafanyabiashara hao kila mmoja kuwa na kitambulisho cha umachinga ambacho kitamuwezesha kujulikana kupitia eneo analofanyia biashara zake za kila siku na kumwezesha kupata Mikopo  inayotolewa na Serikali ya 10% ambayo Halmashauri ya Manispaa ya Ubungo imeshafungua dirisha hilo

Ameendelea kwa kuwaeleza kuwa, vitambulisho hivyo vinamwezesha  mfanyabiashara kuwa katika mipango ya maendeleo ambayo inaweza kuandaliwa kwaajili ya kuboresha ustawi wa wafanyabiashara katika masoko.

Aidha, Bi stela amewaeleza wafanyabiashara hao kuelewa umuhimu wa vitambulisho hivyo pamoja na kutoa elimu kuhusuMikopo ya wafanyabiashara ndogondogo inayotolewa na Wizara ya Maendeleo na  kuratibiwa na  benki ya NMB na mikopo hiyo inariba nafuu ya asilimia 7 na yenye masharti nafuu ambayo hayamuumiza mfanyabiashara ndogondogo bali kumkuza kiuchumi

Nae mfanyabiashara Kulwa anayejihusisha na uuzaji wa matunda amewaasa wafanyabiashara kuhakikisha wanapata vitambulisho hivyo kwani si jambo la hiari ni agizo na vina msaada mkubwa kwani vinampa utambulisho mjasiriamali

Ziara hiyo ni maandalizi ya jukwaa la wafanyabiashara linalotegemewa kufanyika ili kutatua changamoto za wafanyabiashara wadogo (Machinga) baada ya kamati kupita na kutambua wajasiriamali katika masoko hayo na kuwapa elimu juu ya umuhimu wa kujisajili na kutambulikana kama wafanyabiashara wadogo (Machinga)