WAKANDARASI WAONYWA UCHELESHAJI WA MIRADI

Posted on: January 12th, 2024

Wakandarasi waliopata kazi ya kujenga  miradi  mbalimbali ya maendeleo katika Halmashauri ya Manispaa ya Ubungo wametakiwa kuongeza kasi ya utekelezaji wa  miradi hiyo ili wananchi wafurahie matunda ya kodi zao kwa wakati

Hayo yamezungumzwa na wajumbe wa Kamati ya Fedha na Uongozi ya manispaa hiyo wakati wa ziara ya kukagua miradi ya maendeleo iliyotekelezwa katika kipindi cha robo ya pili kuanzia mwezi oktoba hadi disemba 2023 na kusema kuwa  baadhi ya miradi kasi  ya utekelezaji ni ndogo jambo ambalo halina afya kwa Serikali

.

Akiongea wakati wa ziara hiyo, Naibu Meya wa Manispaa  ya Ubungo Mhe Yusuph Yenga amesema kuwa pamoja na kwamba miradi hiyo inatekelezwa kwa ubora unaotakiwa lakini amesisitiza wakandarasi hao wanaojenga miradi ya maendeleo akiwemo mkandarasi anayejenga fremu za maduka ya kisasa katika soko la manzese kuongeza kasi ya ujenzi wa mradi huo kulingana na mkataba.

 Mhe. Yenga ameeleza kuwa " Mfano Mradi huu wa ujenzi wa Fremu za maduka katika soko la Manzese ambao kwa mujibu wa Mkataba unapaswa kukamilika mwezi februari, hatua ya ujenzi bado ipo asilimia za 50 hali ambayo inaonesha kuwa sio rahisi Mkandarasi huyu kumaliza Mradi huu kwa wakati"

Ni vema Wakandarasi wanaopata tenda za kujenga miradi ya Serikali wakatambua umuhimu wa kukamilisha  miradi  hiyo kwa wakati kwani lengo la Serikali ni kuboresha utoaji huduma kwa wananchi wake katika sekta mbalimbali, hivyo mhimu  wakandarasi  kuhakikisha wanakwenda na kasi ya serikali katika utekelezaji wa miradi hiyo.

" Wekeni mafundi wa kutosha wafanye kazi usiku na mchana ili kukamilisha miradi kwa wakati, na wakandarasi wanaochelewesha kukamilisha miradi kwa wakati tutavunja mikataba yao ili wapewe wakandarasi wenye uwezo.

Kamati ya Fedha na Uongozi imefanikiwa kutembelea miradi yenye thamani ya zaidi ya shilingi bilioni 2.5 ikijumuisha Mradi wa ghorofa Hospitali ya Sinza uliogharimu shilingi milioni 663, ujenzi wa Fremu za maduka ya kisasa katika soko la Manzese bilionib1.3 na uboreshaji wa soko la mabibo shilingi milioni 600.