WAMILIKI WA HOTEL WAIPA HEKO IDARA YA MAZINGIRA KWENYE MIPANGO YA UTATUZI WA CHANGAMOTO YA MAJI TAKA

Posted on: August 23rd, 2023

Katika muendelezo wa mikakati ya kampeni ya "Kataa Uchafu, Safisha Pendezesha Ubungo"  Agosti 23, 2023 idara ya mazingira na udhibiti wa taka Ngumu Manispaa ya Ubungo imefanya kikao na wadau wa mazingira kutoka kata ya Sinza, Ubungo na Manzese ili kujadili changamoto mbalimbali za taka ngumu zinazokabili kata hizo na njia bora ya kukabiliana nazo

Wadau walioshiriki kikao hicho ni pamoja na wamiliki wa hoteli na kumbi za starehe ambao hao ndo wadau wakuu wanaozalisha kwa wingi taka ngumu na kutiririsha maji taka kutoka katika maeneo yao ya biashara. Pamoja na wadau hao pia katika kikao hicho walialikwa viongozi wa DAWASA ambao ndio taasisi yenye wajibu wa kukabiliana na maji taka

Akiongea katika kikao hicho afisa tarafa ya Ubungo Ndg. Agnes Kyando ambaye alimuwakilisha mkuu wa wilaya ya Ubungo amesema kuwa wamiliki wa hoteli na kumbi za starehe ni wadau muhimu kuelekea kwenye kampeni ya "Kataa Uchafu, Safisha Pendezesha Ubungo" ambayo inatarajiwa kuzinduliwa Jumamosi ya Agosti 26, 2023 katika kata ya Manzese eneo la Bakhresa, hivyo wajitokeze kwa wingi ili kufanikisha kampeni hiyo

Akiongea katika kikao hicho mkuu wa idara ya Mazingira na udhibiti wa taka ngumu Manispaa ya Ubungo Lawi Benard ametumia kikao hicho kutengeneza uelewa wa pamoja wa changamoto za majitaka  katika maeneo hayo ili kwa pamoja kutafuta suluhu ya kudumu

Kwa upande wa wamiliki, kwanza wameiongeza Manispaa ya Ubungo kwa kufanikisha kikao hicho ambacho wamekiri kuwa ni kikao chenye tija kubwa kwao kwa kuzingatia kuwa biashara zao zimekuwa zikikabiliwa na tatizo la maji taka kwa muda mrefu sasa

Aidha wameuomba uongozi wa DAWASA kuhakikisha wanakuja na majawabu ya kudumu kwa changamoto hiyo ikiwemo kuwa na bomba kubwa la maji taka ili kukabiliana na kero ya majitaka kwa njia ya kisasa zaidi