WANANCHI WAASWA KUILINDA AMANI YA NCHI

Posted on: December 9th, 2024

Mkuu wa wilaya ya Ubungo Mh. Hassan Bomboko ameongoza mamia ya wananchi wa Ubungo kufanya usafi eneo la Stendi ya mabasi Magufuli pamoja na upandaji wa Miti ya kivuli 270 leo ikiwa ni katika kusherehekea kilele cha miaka 63 ya Uhuru wa Tanzania bara.

Hayo yamefanyika Disemba 9, 2024 katika maeneo mbalimbali ya Manispaa ya Ubungo kabla ya kuhitimishwa rasmi katika viwanja vya stendi ya Mabasi Magufuli ambapo Watumishi wa Manispaa, Jeshi la Polisi, Jeshi la Akiba na Taasisi mbalimbali pamoja na wananchi wamejumuika katika zoezi la kufanya usafi pamoja na upandaji wa miti.

Akizungumza na wananchi katika kilele hicho mara baada ya zoezi la usafi na upandaji wa miti, lilioambata na michezo mbalimbali na Jogging, Bomboko ametoa rai kwa wananchi kuilinda amani ya nchi ili kuendelea kuwa na mshikamano.

"Tunafanya shughuli zetu kwa kuwa Taifa letu lina amani hivyo tuendelee kuenzi amani ya nchi yetu, kwani amani ikiondoka hatuwezi kufanya shughuli zozote” amesema Bomboko.

Amebainisha kuwa, nia na dhamira ya dhati ya Rais wa Tanzania Mh. Rais Samia Suluhu Hassan ni kutatua changamoto mbalimbali zinazomkabili mtanzania.

"Nitoe rai kwenu Madiwani, Mstahiki Meya, Wananchi na viongozi wa vyama hata vile vyama rafiki, tusione haya kusema yaliyofanywa na huyu mama. Mama amefanya makubwa kwenye Afya, Barabara,  Vituo vya Afya na Hospitali, kwa Ubungo hatuna tunachomdai, bali anatudai sisi mwakani"- amesema Bomboko

Aidha Kaimu Mkurugenzi wa Halmashauri ya Manispaa ya Ubungo William Mlenduke amesema idadi ya miti iliyopandwa kupitia maadhimisho haya ndani ya wilaya ya Ubungo kwa mwaka 2024/25  kufikia 425, 360.

Miiti hiyo imepandwa pembezoni mwa barabara ya Morogoro,  Pembezoni mwa mto Mpiji, Mto Mbezi na Luganga pamoja na ofisi mbalimbali za serikali zinakotolewa huduma za kijamii.

Amesema miaka 63 ya Uhuru inatukumbusha uzalendo kwa taifa letu na kuendeleza umoja na mshikamano kwa jamii yote ya watanzania.

"Maadhimisho haya yaliyofanywa kwa shughuli mbalimbali za kimaendeleo yawe chachu ya maendeleo endelevu kwa Taifa letu ili kufikia malengo tuliyojiwekea" amesema Mlenduke.