WATENDAJI KATA UBUNGO WATEMBELEA MANISPAA YA MOSHI

Posted on: December 21st, 2023

Watendaji wa Kata wa Manispaa ya Ubungo wakiongozana na Maafisa Tarafa wa Manispaa hiyo akiwemo Afisa Tarafa wa tarafa ya Kibamba Beatrice Mbawala pamoja na Agnes Kyando Afisa Tarafa wa tarafa ya Magomeni pamoja na Mkuu wa Idara ya Mazingira na Maliasili  tarehe 21/12/2023  wameitembelea Manispaa ya Moshi kwa lengo la kujifunza masuala ya usimamizi wa usafi wa mazingira.

Akiongea Mkuu wa Kitengo cha mazingira na usafishaji Manispaa ya Moshi Viane Komba amesema Manispaa hiyo imefanikiwa kwa kiasi kikubwa juu ya usafi wa mazingira kutokana na uwekaji wa mikakati madhubuti iliyowekwa na kusimamiwa na Manispaa hiyo juu ya usimamizi wa usafi wa mazingira

Akiongelea mikakati hiyo Viane amesema Manispaa hiyo imeweka vikundi maalumu kwenye Kata zote 21 za Manispaa hiyo ambavyo vimepewa jukumu la kusimamia sheria ndogo ya usafi wa mazingira ya Manispaa Moshi ya mwaka 2006 iliyofanyiwa marekebisho mwaka mwaka 2017 sambamba na sheria ya mazingira no 20 ya mwaka 2004, sheria ya afya ya jamii no 1 ya mwaka 2009.

Viane ameendelea kueleza kwa mujibu wa sheria ndogo za Manispaa hiyo vikundi hivyo vimepewa nguvu ya kutoza faini ya papo kwa papo isiyozidi kiasi cha shilingi elfu hamsini kwa wachafuzi wa mazingira na asilimia 50 ya faini inayotozwa hubaki kwa kikundi husika kama malipo kwa wanakikundi.

Aidha, Viane amesema Manispaa hiyo mbali na kufanikiwa kwa kiasi kikubwa juu ya usimamizi wa usafi wa mazingira pia imefanikiwa kwenye masuala mbalimbali ikiwemo uzalishaji wa mbolea kwa kutumia taka na hivyo kupunguza taka zinazotupwa dampo na kuongeza mapato ya Manispaa, uwepo wa dampo la kisasa kwa ajili ya kutupa taka na ugatuaji wa shughuli za usafi wa mazingira katika ngazi ya Kata.

Nae Afisa Mtendaji Kata wa Bondeni Manispaa ya Moshi Philipina Philipo Tenga amesema ngazi ya Kata inajukumu la kuratibu  kwa ukaribu shughuli za usafi wa mazingira, kukusanya mapato yatokanayo na ada za  taka pamoja na kusimamia matumizi ya Fedha hizo ngazi ya Kata, kuchangia asilimia 3 au 5 ya mapato ya Ada ya taka kwa ajili ya matengenezo ya magari ya kuzoa taka ngumu pamoja na usimamizi wa sheria ndogo kwenye maeneo ya Kata.