WATOTO 331 WANAOISHI NA KUFANYA KAZI MTAANI MANISPAA YA UBUNGO WASAIDIWA NA KUONDOLEWA MTAANI

Posted on: September 5th, 2024

Manispaa ya Ubungo kupitia Idara ya Ustawi wa jamii kwa kushirikiana na shirika la SOS Children Village Dar es salaam na wadau wengine wamefanikiwa kuwarejesha jumla ya watoto 331 wanaoishi na kufanya kazi mitaani kuungana na familia zao ili kupunguza wimbi la ongezeko la watoto hao Manispaa ya Ubungo na kuhakikisha kuwa wanapata malezi stahiki.

Hayo yameelezwa na Afisa mfawidhi sehemu ya ustawi wa jamii Manispaa ya Ubungo Bi. Zainabu Masilamba wakati akisoma taarifa ya watoto wanaoishi na kufanya kazi mtaani Manispaa ya Ubungo kwa kipindi cha Januari 2024 hadi Septemba 2024 katika kikao kazi na maafisa wa Shirika la SOS Children Village Dar es salaam kutoka Norway walipofika ofisini jana 5/9/2024 kuzungumza na kujionea namna Manispaa na wadau wengine wanavvyotekeleza afua mbalimbali za kuwasaidia watoto wanaoishi katika mazingira Magumu.

Amesema katika kipindi cha Julai 2023 hadi Mei 2024, Manispaa ya Ubungo ilifanikiwa kuwatambua na kuwaondoa jumla ya watoto 163 waliokuwa wakiishi mtaani ambapo wasichana walikuwa 116 na wavulana 47.

Katika kipindi cha Juni 2024 hadi Septemba 2024 wamefanikiwa kuwaunganisha nafamilia zao watoto 48, wakike wakiwa 29 na wakiume wakiwa 19, walipo kwenye Makao ni 111, Wavulana 79 na Wasichana 32 huku idadi ya waliorudishwa shule na kunganishwa namafunzo ya Ufundi stadi wakifikia 9, Wavulana 2 na Wasichna 7 katika kipindi kama hicho.

Aidha amesema serikali kwa kushirikiana na wadau wengine huwatambua na kuwachukua watoto hao na kupelekwa nyumba za makao maalum ili waweze kupatiwa ushauri nasaha, kuwaandaa kisaikolojia, kupatiwa huduma za afya na kuandaliwa kwa ajili ya kusafirishwa kurejea kwa wazazi ili kuungana na familia.

Amebainisha kuwa, Watoto hawa hufanya kazi na kuishi katika maeneo ya daraja la Kijazi, Kituo cha Mabasi cha Magufuli, Stendi ya Mabasi Mbezi, Mlimani City (Super Star), Daraja la Manzese na Soko la Mabibo.

Baadhi ya washiriki wa kikao hicho walibainisha kuwa baadhi ya watoto wanakimbia familia kujiunga na maisha ya kuwa watoto wa mitaani kwa sababu ya migogoro iliyopo kwenye familia zao