WATUMISHI UBUNGO WAPEWA MAFUNZO YA NEST MOROGORO

Posted on: February 3rd, 2024

Mkurugenzi wa Manispaa ya Ubungo Ndg. Elias Ntiruhungwa amewataka Watumishi wa Halmashauri ya Manispaa  hiyo wanaoshiriki mafunzo ya Mfumo mpya wa Manunuzi ya Umma kwa njia ya kielektroniki (National e-procurement system of Tanzania_NEST) ambao ulianza kutumika rasmi tarehe mosi Oktoba, 2023 baada ya mfumo wa zamani  wa TANePS kufika ukomo wake kuzingatia mafunzo yanayotolewa juu ya mfumo huo.

Ntiruhungwa ametoa maelekezo hayo wakati akifungua mafunzo ya mfumo huo yanayofanyika mkoani Morogoro  kwa watumishi hao lengo ikiwa ni kuwajengea uwezo wa namna ya kutumia mfumo huo mpya katika manunuzi yote ya Umma.

"Kutokana na umuhimu wa mfumo huu niwasihi washiriki wote kuzingatia kwa makini mafunzo haya ili kuelewa vizuri matumizi ya mfumo huu Mhimu katika kufanya manunuzi yote ya  Umma kwenye Halmashauri yetu" alisisitiza Ntiruhungwa.

Ntiruhungwa amesema kuwa, baada ya kuona Umuhimu wa Mfumo huo, "niliona ni vema niwaombe PPRA watujengee uwezo namna ya kutumia mfumo huu ili manunuzi yasikwame lakini pia tusiende kinyume na sheria ya ununuzi"

Akiongea na washiriki, mwezeshaji wa mafunzo hayo Kutoka PPRA ndugu Anthony Underson Masau amesema "Mfumo huu wa NEST ni rafiki na rahisi kwa watumishi, ni wawazi na shirikishi hivyo unaondoa mianya yote ya upendeleo na rushwa hivyo utaongeza uwajibikaji na uwazi katika kufanya ununuzi ya Umma.

Masau ameendelea kueleza kuwa, Mfumo huu pia unarahisisha utendaji kazi wa Serikali katika kushindanisha wazabuni, uundaaji wa zabuni ndani ya mfumo na utaondoa matumizi ya karatasi (paper Work) kwani kila kitu kitafanyika ndani ya Mfumo

Kwa upande wake kaimu mkuu wa kitengo cha Uhifadhi wa Maliasili na Mazingira Bi Nice Vahaye ameshukuru kupatiwa mafunzo hayo mhimu kwani yatamjengea uelewa wa mfumo utakaopelekea ufanisi katika matumizi sahihi ya mfumo huo. 

 "Pamoja na kuwa mfumo tulishaanza kuutumia lakini ufanisi wake ulikuwa mdogo kutokana na uelewa wa matumizi wa mfumo huo ulikuwa mdogo, natumai baada ya mafunzo haya watumishi watakuwa na uwezo wa kutumia vizuri mfumo huu mhimu ukizingatia zaidi ya asilimia 80 ya bajeti ya Halmashauri yetu inahusu manunuzi" alisema Nice