WAZIRI BASHUNGWA ATEMBELEA UBUNGO, ASEMA NENO

Posted on: November 13th, 2023

Wizara ya ujenzi ipo kazini usiku na mchana kuhakikisha changamoto zote za miundombinu katika wilaya ya Ubungo zinapungua kwa kiasi kikubwa ikiwa ni pamoja na ujenzi wa barabara mbalimbali kwa kiwango cha lami, ujenzi wa vivuko pamoja na madaraja" Hayo yamesemwa na waziri wa ujenzi Mhe. Innocent Bashungwa (MB) akiwa kwenye ziara yake katika wilaya ya Ubungo mapema  Novemba 13, 2023

Akiwa katika ziara hiyo Bashungwa amekagua mradi wa barabara ya kilomita 1.5 iliyojengwa kwa kiwango cha lami kutoka Kibamba kwenda Kibwegere ambapo ameahidi kumalizia Kilomita 5 zilizosalia kwa kiwango cha lami ila kuwarahisishia usafiri wakazi wa maeneo hayo na watanzania wote kwa ujumla

"Mbunge wa jimbo la Kibamba Mhe. Issa Mtemvu anafanya kazi nzuri na amekuwa akinikumbusha kila mara kuhusu barabara hii pamoja na barabara ya Mbezi kwa Yusuf kwenda Mpigi Magoe ambapo barabara zote hizo zipo kwenye vipaumbele vyetu ili zijengwe kwa kiwango cha lami" alisema Bashungwa

Aidha tayari Mhe. Bashungwa ameagiza mameneja wote wa wilaya na mikoa wa TANROADS kuainisha vipaumbele vya barabara zote muhimu kwenye maeneo yao ili ujenzi wake uendane kulingana na umuhimu wa matumizi ya barabara hizo

Pia, Mhe. Bashungwa amekagua barabara ya Kimara - Bonyokwa ambayo imeathirika kwa kiwango kikubwa na mvua inayoendelea hivi sasa katika mkoa wa Dar es Salaam ambapo ametumia nafasi hiyo kuwahakikishia wakazi wa maeneo hayo kuwa ujenzi wa barabara hiyo kwa kiwango cha lami unatarajiwa kuanza mwezi Disemba 2023

Tayari Mhe. Bashungwa amemuagiza meneja wa TANROADS kuhakikisha anaanza kutekeleza mpango wa dharura kwa nyakati za usiku ili kuwezesha barabara hiyo kupitika wakati inasubiri mkandarasi kuanza kazi mapema mwezi Disemba

Akitoa shukrani mkuu wa mkoa wa Dar es Salaam Mhe. Albert Chalamila amemshukuru waziri Bashungwa kwa jitihada zake za kuwafikia wana Ubungo na kutoa msukumo wa utekelezaji wa miradi ya miundombinu

Nae mbunge wa jimbo la Ubungo Mhe. Kitila Mkumbo amemshukuru waziri Bashungwa kufika kwenye jimbo lake na kujionea adha ya usafiri wanayopata wananchi  hivyo ni imani yake kuwa ujenzi wa barabara hiyo utaanza na kukamilika kwa muda uliopangwa kuanzia Disemba 2023