42NPeS5Q4BKB9WVXmoZUS39DmsBoQRS77rB6mpjYf4AYw4eKcZg4WeK2hgeUyGrPxtWF8mkfxUiEiKTi3i8pUPwz9muX

Posted on: February 6th, 2025

Jeshi la Zimamoto na Uokoaji halmashauri ya Manispaa ya Ubungo limeendesha mafunzo kuwajengea uwezo kinadharia na kwa vitendo watumishi ikiwa ni sehemu ya hatua zake madhubuti katika kuimarisha usalama na kuandaa watumishi kwa ajili ya kushughulikia majanga ya moto kupitia mafunzo maalum ya zima moto.

Mafunzo hayo muhimu, yaliyofanyika katika ukumbi wa Halmashauri ya Manispaa ya Ubungo, yalihusisha watumishi kutoka idara mbalimbali za halmashauri, na ni sehemu ya jitihada za kuongeza ufanisi katika kukabiliana na majanga ya moto ambayo yanaweza kutokea wakati wowote.

Akifungua Mafunzo hayo kwa watumishi, Afisa Utumishi, anayeshughulikia sehemu ya utawala Bw. Fredrick Mbigili alisema kuwa, ni muhimu kwa watumishi wa Serikali kuwa na mafunzo ya kina kuhusu mbinu za kisasa za kuzima moto ili kuwa na uwezo wa kupunguza madhara makubwa ambayo mara nyingi hutokea kutokana na majanga haya.

“Mafunzo haya ni sehemu ya kuhakikisha kuwa watumishi wetu wanakuwa na ufanisi mkubwa katika kutekeleza majukumu yao ya kila siku, na pia tunajenga utayari wa kutosha ili kuhakikisha usalama katika jamii yetu. Wakati tukiona majanga ya moto yakizidi kutokea, ni muhimu kuwa na wataalamu watakaoweza kujibu changamoto yoyote inayoweza kutokea kwa haraka na kwa ufanisi,” alisema Bw. Mbigili

Naye Mrakibu Msaidizi wa Jeshi la Zimamoto na Uokoaji wilaya ya Ubungo (ASF) Isack J. Njombe ambaye alikuwa mwezeshaji wa mafunzo hayo aliwaeleza washiriki kuhusu mifumo mbalimbali iliyopo ya majengo na nyumba za kuishi kwaajili ya kujikinga na kujiokoa na majanga ya moto yanapotokea.

Mafunzo hayo yalijumuisha masomo kuhusu mbinu za kisasa za kuzima moto, hatua za dharura zinazopaswa kuchukuliwa wakati wa tukio la moto, na jinsi ya kuhamasisha jamii kuchukua tahadhari ili kupunguza hatari ya moto.

Watumishi walijifunza pia kuhusu mbinu za kutoa msaada wa haraka katika matukio ya moto, hatua muhimu za kuhakikisha usalama wa wahanga, na namna ya kushirikiana na vikosi vya uokoaji wakati wa dharura ikiwa ni pamoja na kutumia vifaa vya kisasa vya kuzima moto na kujua mbinu bora za kudhibiti moto