KAUSAPEU YAREJEA KWA KISHINDO UBUNGO, USAFI WASISITIZWA

Posted on: January 31st, 2026

Halmashauri ya Manispaa ya Ubungo, ikiongozwa na Mstahiki Meya Laurent Mlaki, Januari 31 imefufua upya kampeni ya Kataa Uchafu Safisha Pendezesha Ubungo (KAUSAPEU) kupitia zoezi la usafi wa mazingira lililofanyika katika Kata ya Goba, ikiwa ni sehemu ya mkakati wa kurejesha na kuimarisha hali ya usafi katika manispaa hiyo.

Zoezi hilo lililohusisha ukusanyaji wa taka, usafi wa mitaro, barabara na maeneo ya wazi, lililenga kuzuia milipuko ya magonjwa yatokanayo na uchafu pamoja na kujenga utamaduni wa ushiriki wa wananchi katika kulinda mazingira yao.

Mkuu wa Wilaya ya Ubungo Mh. Albert Msando, aliyemwakilisha Mkuu wa Mkoa wa Dar es Salaam, amewapongeza wananchi wa Goba kwa kujitokeza kwa wingi na kuonesha mshikamano ambapo amesisitiza kuwa usafi ni jukumu la kila mwananchi kisheria na si la serikali pekee huku akionya kuwa hatua za kisheria zitachukuliwa kwa watakaokiuka taratibu za usafi.

Aidha, Msando amezielekeza serikali za mitaa na kamati za mazingira kuhakikisha kila mfanyabiashara anafanya usafi kila siku mbele ya eneo lake, huku akionya dhidi ya wananchi wanaokataa kulipa tozo za taka.

Katika hatua nyingine, ameagiza kandarasi za ukusanyaji taka zichukuliwe kutoka kwa wakandarasi wasiofanya kazi na kupewa vikundi vya vijana na wanawake kupitia mikopo ya asilimia 10, hatua inayolenga kuboresha usafi na kuinua uchumi wa wananchi.

Kwa upande wake, Mstahiki Meya Mh. Lawrence Mlaki ameishukuru Idara ya Mazingira ya Manispaa ya Ubungo, wadau mbalimbali wakiwemo Chama cha Washehereshaji Tanzania, mabalozi wa mazingira, madiwani na wananchi kwa ushiriki wao, huku akiwasihi wananchi kuendeleza usafi hata nje ya siku maalum ambapo ametumia jukwaa hilo kutangaza mpango wa utoaji wa tuzo kwa mitaa itakayofanya vizuri na hatua kwa ile itakayoshika mkia katika suala la usafi.

Hata hivyo,  Mkuu wa Kitengo cha Udhibiti wa Taka Ngumu na Usafishaji manispaa ya Ubungo Bw. Lawi Bernard Mgongo amesema wataendelea kutoa elimu ya mazingira kwa jamii na kusimamia utekelezaji wa sheria ndogo ndogo za usafi ili kuhakikisha Ubungo inakuwa safi, salama na yenye kuvutia kwa wenyeji na wageni.