HALMASHAURI ZATAKIWA KUONGEZA KASI YA UKUSANYA WA MAPATO-NAIBU WAZIRI OFISI YA WAZIRI MKUU

Posted on: January 3rd, 2026

Halmashauri Zatakiwa Kuongeza Kasi ya ukusanyaji  Mapato

Naibu Waziri Ofisi ya Waziri Mkuu – Tawala za Mikoa na Serikali za Mitaa (OWM–TAMISEMI) anayeshughulikia Elimu, Mhe. Reuben Kwagilwa, amezitaka Halmashauri zote nchini kuongeza kasi ya ukusanyaji wa mapato na kusimamia ipasavyo matumizi sahihi ya fedha hizo.

Mhe. Kwagilwa ametoa maelekezo hayo tarehe 03 Januari, 2026, wakati wa kikao kazi cha kuhitimisha ziara yake mkoani humo, kilichofanyika katika Ukumbi wa Idd Nyundo, Manispaa ya Temeke ambapo kilihusisha wataalamu kutoka Halmashauri pamoja na Taasisi za Umma.

Akizungumza katika kikao hicho, Mhe. Kwagilwa aliwaelekeza wataalamu kuwa “Nendeni mkaongeze kasi ya ukusanyaji wa mapato na msimamie matumizi sahihi ya fedha hizo ipasavyo, ikiwemo utekelezaji wa miradi ya maendeleo.”

Aidha, amewataka Wakurugenzi wa Halmashauri zote nchini kuhakikisha fedha za asilimia 10 zinawafikia walengwa kwa wakati, pamoja na kuhakikisha fedha hizo zinarejeshwa kwa mujibu wa sheria na taratibu zilizopo.

Mhe. Kwagilwa alifanya ziara ya kutembelea na kukagua utekelezaji wa miradi ya maendeleo katika Halmashauri zote za Mkoa wa Dar es Salaam mwishoni mwa mwaka jana.