BANDA LA UBUUNGO LAFURIKA, MAONESHO YA NANE NANE - MOROGORO

Posted on: August 8th, 2025

Banda la Ubungo Lafurika Nanenane Morogoro – Viongozi, Wananchi Wajionea Ubunifu na Maendeleo ya Sekta ya Kilimo, Mifugo na Uvuvi

Ikiwa ni kilele cha sikukuu ya wakulima na sherehe za wavuvi na wafugaji zinazoendelea Katika maonesho ya Nanenane yanayoendelea katika viwanja vya Nanenane, banda la Halmashauri ya Manispaa ya Ubungo limevutia mamia ya watu wakiwemo viongozi wa serikali, wananchi wa kawaida, wataalamu wa sekta mbalimbali pamoja na wanafunzi waliokuja kujifunza na kujionea kwa macho ubunifu na maendeleo ya sekta ya kilimo, mifugo na uvuvi.

Tangu kufunguliwa kwa maonesho hayo, kumekuwa na msururu wa watu wakimiminika katika banda hilo maarufu kutokana na namna lilivyoandaliwa kitaalamu, kuonyesha teknolojia bunifu, bidhaa za asili zilizoongezwa thamani, vipando bora vya mazao mbalimbali, mifugo yenye tija, na mbinu mpya za kisasa za uvuvi.

VIONGOZI WATEMBELEA, WAPONGEZA

Miongoni mwa viongozi waliotembelea banda hilo ni pamoja na Wakuu wa idara, vitengo na sehemu, viongozi wa mikoa na wilaya, wakuu wa taasisi mbalimbali za utafiti kutoka maeneo mbalimbali nchini.

Viongozi hao walionesha kufurahishwa na namna Manispaa ya Ubungo ilivyoweza kuonesha utekelezaji wa sera za serikali kwa vitendo kupitia ubunifu na matumizi ya teknolojia rafiki kwa wakulima na wafugaji.

Akizungumza baada ya kutembelea banda hilo, mmoja wa viongozi hao alisema:

"Hili ni banda la mfano. Ubungo wameonyesha dhahiri kuwa kilimo kinaweza kuwa cha kisasa na chenye faida. Hii ni hatua kubwa kuelekea mapinduzi ya kilimo nchini."

WANANCHI WAJIONEA FURSA NA KUJIFUNZA

Kwa upande wa wananchi waliofika, wengi wao walieleza kufurahishwa na maonyesho hayo ambayo yamewapa maarifa mapya kuhusu njia bora za kilimo cha umwagiliaji, ufugaji wa kisasa wa kuku, ng’ombe wa maziwa, pamoja na uzalishaji wa samaki kwenye mabwawa ya kisasa.

Aidha, vipando vya kisasa vya mazao kama mahindi, mihogo, mboga mboga, pamoja na miche ya matunda vilivutia wengi waliokuwa na shauku ya kuboresha shughuli zao za kilimo. Wengine walivutiwa na bidhaa za kuongeza thamani kama vile siagi ya karanga, sabuni za asili, unga wa mihogo, na juisi mbalimbali zilizotengenezwa kwa viungo vya asili.