BARAZA LA BIASHARA LAFANYIKA UBUNGO, LAPOKEA NA KUTATUA CHANGAMOTO.

Posted on: December 16th, 2024

Baraza la biashara Wilaya ya Ubungo limefanyika mapema l tarehe 16 Disemba, 2024 ambapo wajumbe wa Baraza hilo wameweza kuchangia, kujadili na kutoa ushauri wa masuala mbalimbali na kero zao ambazo zimetatuliwa.

Akizungumza katika baraza hilo, Mkuu wa Wilaya ya Ubungo Mhe. Hassan Bomboko amesema kuwa, kupitia  majadiliano ambayo yamefanyika na wajumbe wa baraza hilo ambapo mambo mbalimbali yamewasilishwa na kujadiliwa  majibu yanaenda kutolewa kwa haraka ikiwemo  kuandaliwa kwa orodha ya wafanyabiashara wa wilaya nzima ili waweze kupangwa katika maeneo rasmi.

Na pia katika changamoto ya Barabara ,Maji pamoja  na Masuala ya  Urasimishaji, DC Bomboko  ameahidi kuwa changamoto hizo zinafanyiwa kazi na muda sio mrefu taarifa itatolewa ya maeneo gani ambayo yataanza kufanyiwa kazi.

Kuhusu Barabara, amesema  ukarabati unaendelea katika maeneo mbalimbali kwa kuanza kuchongwa na kujengwa kupitia mapato ya ndani ya Halmashauri ambapo kwa kila Kata jumla ya shilingi Milioni 20 imetengwa  kukamilisha zoezi hilo.

DC Bomboko amemuagiza Afisa Biashara kutoe elimu kwa wafanyabiashara kuhusu tozo na ushuru ambao Manispaa inakusanya ili kuwajengea uelewa na kutoa tozo hizo kwa wepesi bila malalamiko.

Wakati huo huo, Bomboko amewataka TRA kufanya vikao vya mara kwa mara na wafanyabiashara ili kuwapa uelewa wa pamoja  kuhusu masuala mbalimbali yanayohusu tozo na ushuru.

Wakizungumza kwa nyakati tofauti wajumbe wa Baraza hilo, wameshauri wafanyabiashara kupewa elimu kuhusu elimu ya mlipa Kodi kujengewa miundombinu bora ya kufanyia Biashara ili kuwa na uelewa wa pamoja ili kusaidia kutoa Kodi kwa hiari bila usumbufu.

Aidha, Mkuu wa idara ya Viwanda, Biashara na Uwekezaji Manispaa ya Ubungo Marry Mwakyosi amewataka wafanyabiashara kuzingatia utoaji wa tozo na ushuru wa Halmashauri ili kuwezesha Serikali kufanya maendeleo.

Nae, Mwenyekiti wa wafanyabiashara ndogondogo Ibrahim Ally amemshukuru Mkuu wa Wilaya kwa kuweza kuwasikiliza na kuwapa majibu ya changamoto zao.