BARAZA LA BIASHARA WILAYA YA UBUNGO LAZINDULIWA RASMI

Posted on: February 15th, 2021

Mkuu wa wilaya ya Ubungo ambaye pia ni Mwenyekiti wa baraza la biashara la Wilaya hiyo  Mhe. Kisare Makori leo februari 15, 2021 amezindua baraza hilo lililojumuisha wajumbe kutoka sekta za umma na sekta binafsi  ikiwa ni chombo cha kisheria cha kusimamia masuala ya biashara zao wilayani hilo.

Akizungumza kwenye kikao cha uzinduzi wa baraza hilo mwenyekiti huyo alieleza kuwa ukuaji wa uchumi unategemea zaidi biashara zinazoendeshwa na sekta binafsi kwa kulipa kodi, kutoa ajira na masuala mbalimbali ya ustawi wa jamii na Taifa kwa ujumla hivyo baraza hilo litasaidia kutengeneza mazingira bora ya kibiashara ili kuleta faida kwa wafanyabiashara na serikali.

Mwenyekiti aliendelea kueleza kuwa kupitia baraza hilo  wajumbe wa sekta binafsi na sekta za umma  kujengeana  uelewa wa mapoja kuhusu masuala mbalimbali yanayohusu uendeshaji wa biashara, ikiwemo sheria na kanuni zinazosimamia biashara pamoja na kuainisha fursa zilizopo na namna ya kuzitumia kwa lengo la kukuza uchumi.

Akisoma taarifa fupi kuhusu baraza la biashara mwakilishi kutoka baraza la biashara la Taifa (TNBC)  Willy Magehema ameeleza kuwa uanzishwaji wa baraza hilo ni wa kisheria kupita  waraka wa Rais Na.1 wa mwaka 2001 likiwa na lengo la kuunda jukwaa la majadiliano kati ya Sekta za Umma na Binafsi ili kuboresha mazingira ya biashara na uwekezaji.

Wajumbe wa baraza la biashara la wilaya  ya Ubungo  wakifuatilia mjadala 

"Baraza hili ni chombo halali cha kisheria cha  kuchambua changamoto zinazokwamisha biashara katika wilaya yenu na kuzijadili kwa pamoja na hatimaye kujenga uelewa wa pamoja kuhusu uendeshaji wa biashara unaoleta manufaa kwa pande zote mbili katika harakati za kukuza uchumi" alifafanua Magehema.

 Magehema amesisitiza kuwa ameeleza baraza  lina wajibu mkubwa wa kutengeneza mazingira bora ya kufanya biashara na kuwekeza, kuibua fursa za uwekezaji na  kuzindua fursa hizo kupitia makongamano ya uwekezaji pamoja na kuandaa midahalo mahususi.

Aidha Magehema,   alitumia nafasi hiyo kutoa rai kwa wajumbe wa baraza hilo  kubuni , kushauri na kuboresha mazingira   ya kibiashara ili kukaribisha wawekezaji katika maeneo ya wilaya ya Ubungo.

Kwa upande wake mwenyekiti wa wafanyabiashara sekta binafsi (TCCIA) Clement Bocco  amesema kuwa kuzinduliwa kwa  baraza hilo ni fursa nzuri kwa wafanyabiashara  kwani litatumika kutuunganisha na sekta za umma na hatimaye kuzungumza lugha moja katika kuhakikisha wafanyabiashara anakuwa na mazingira bora kufanyia biashara na serikali kukusanya Lodi bila malalamiko.

Bocco anaamini kuwa "Ubungo ni wilaya mpya, inakua, tunategeme kwa pamoja tutahakikisha tunatumia fursa zilizopo ili kukuza biashara zenu kwa kuboresha utoaji wa huduma na  kutoa /kuzalisha ajira nyingi"