BARAZA LA MADIWANI UBUNGO LAPITISHA TAARIFA YA UFUNGAJI WA HESABU ZA MWISHO 2022/2023.

Posted on: August 30th, 2023

Mkutano maalumu wa Baraza la Madiwani la Manispaa ya Ubungo leo tarehe  30/08/2023 limekutana kujadili na kupitisha taarifa za ufungaji wa hesabu za mwisho wa mwaka wa fedha 2022/2023 ikiwa ni utekelezaji wa maelekezo ya sheria ya fedha za Serikali za Mitaa “The Local Government Finance Act” section 48(4) ya mwaka 1982 iliyorekebishwa mwaka 2010.

Akiongea wakati anawasilisha taarifa hiyo Mkuu wa Kitengo cha Fedha Ndg. Revocatus Mohabe ameeleza kuwa taarifa hiyo imejumuisha taarifa mbalimbali ikiwemo taarifa ya mizania, mapato na matumizi, mtiririko wa fedha, mabadiliko ya mtaji na maelezo kuhusu Halmashauri.

Mohabe ameendelea kueleza kuwa Manispaa ilifunga hesabu hizo kwa kufuata muongozo wa “Public Finance Act, Local Government Financial Memorandum” 2010, viwango vya kimataifa vya ufungaji wa hesabu wa kimataifa, miongozo ya Mhasibu Mkuu wa Serikali pamoja na Mdhibiti na Mkaguzi Mkuu wa Hesabu za Serikali.

Akielezea taarifa ya mapato na matumizi Mohabe ameeleza kuwa kwa mwaka wa fedha 2022/2023 hesabu za Manispaa zinaonesha kuwa hadi kufikia tarehe 30/06/2023 mapato yalikuwa na jumla ya shilingi 106,720,836,956 na matumizi ya shilingi 101,535,606,519.

Aidha, Mohabe ameeleza kuwa Manispaa imeweka mikakati juu ya uboreshaji wa  ukusanyaji wa mapato ili kuhakikisha vyanzo vyote vya mapato vinakusanywa na kusimamiwa kwa viwango  vinavyohitajika.

Kwa upande wake Katibu Tawala wa Wilaya ya Ubungo Mhe. Hassan Mkwawa ameitaka Wilaya hiyo kusimamia vyema matumizi ya Fedha kwa kufuata sheria, kanuni, taratibu na miongozo ya Fedha sambamba na kusimamia mikakati ya ukusanyaji wa mapato na kuwataka kuendelea kutekeleza miradi mbalimbali ya maendeleo ndani ya Wilaya hiyo.

Nae Mstahiki Meya wa Manispaa hiyo Mhe. Juma Nyaigesha amewataka wataalamu wa Manispaa hiyo  kuendelea kuboresha ukusanyaji wa mapato na amesisitiza  juu ya usimamizi wa mapato na matumizi ya Manispaa hiyo.