BARAZA LA MADIWANI UBUNGO LAVUNJWA, DC MSANDO AWAMWAGIA SIFA

Posted on: June 20th, 2025

Mkuu wa wilaya ya Ubungo Mh. Albert Gasper Msando ameipongeza Halmashauri ya Manispaa ya Ubungo kwa mafanikio iliyoyapata katika kusimamia na kutekeleza miradi yake kwa kiwango kikubwa.

DC Msando amesema Manispaa hiyo ni ya mfano kutokana na kusimamia vema miradi yake na kuitekeleza kwa kiwango kikubwa jambo ambalo ni tofauti na Manispaa nyingine nchini.

Alisema kuwa kwa uongozi madhubuti wa Mstahiki Meya na Baraza lake wameongeza makusanyo kutoka shilingi bilioni 18.1 mwaka 2020/21 hadi shilingi Bilioni 41.3 Mwaka 2024/25 sawa na ongezeko la shilingi bilioni 23.2 mwaka 2024/25 ambapo imesaidia kuweza kusimamia miradi yake kwa fedha zake katika miradi ya Barabara, Maji na Shule.

DC Msando aliyasema hayo wakati wa Mkutano wa kuliahirisha Baraza la Madiwani wa Manispaa ya Ubungo iliyofanyika kwenye ofisi za Manispaa ya Ubungo Juni 20, 2025.

Kwa upande wake Mstahiki Meya aliyemaliza muda wake Mh. Jaffar Nyaigesha aliwaahidi wananchi wa Manispaa yake kuendelea kushirikiana nao katika kuyaendeleza yale yote waliyoyafanya kwa kushirikiana na Madiwani na Watendaji wa Manispaa hiyo hata pale itakapotokea hawatarudi tena kwenye nafasi zao.

Aidha alisema kuwa anajivunia mafanikio makubwa yaliyoipata Manispaa katika kipindi cha uongozi wake ikiwemo sekta ya Elimu Msingi na Sekondari,  Sekta ya Afya, Uwezeshaji wananchi kiuchumi, Ukusanyaji wa Mapato, Kuongeza sekta ya Biashara, Viwanda na Uwekezaji. 

Hata hivyo Meya huyo aliwataka wananchi kuendeleza kampeni ya uwekaji safi mazingira ya Manispaa hiyo ili kupuka maradhi mbalimbali yanayosababishwa na uchafu.

Naye Mkurugenzi Mtendaji wa Halmashauri ya Manispaa ya Ubungo Dkt. Aron Kagurumujuli akisoma taarifa ya utekelezaji wa shughuli za Maendeleo katika kipindi cha Miaka mitano (2020/21 -2024/25) pamoja na mapendekezo ya uendeshaji wa shughuli za Halmashauri kipindi cha Mpito, amesema katika kipindi cha miaka 5 baraza limepata mafanikio makubwa ambapo jumla ya shule mpya saba (8) za awali na Msingi zimejengwa na kusajiliwa na kufanya jumla ya shule 69 za awali na Msingi kutoka shule 65 za awali na 64 za Msingi  zilizokuwepo mwaka 2020/2021.