BARAZA LA WATUMISHI UBUNGO LAPITISHA BAJETI 2024/2025

Posted on: February 10th, 2024

Baraza maalumu la wafanyakazi Manispaa ya Ubungo likiongozwa na Mwenyekiti wa baraza hilo leo tarehe 10/02/2024 limepitisha makisio ya mpango na bajeti kwa mwaka wa fedha 2024/2025 baada ya kujilidhisha kuwa stahiki mbalimbali za watumishi ndani ya Manispaa hiyo zimezingatiwa katika bajeti hiyo.

Akiwasilisha taarifa ya makisio ya mpango na bajeti kwa mwaka wa fedha 2024/2025 Ndg. Andambike Kyomo Mkuu wa Idara ya Mipango na Uratibu ameeleza kuwa Halmashauri ya Manispaa ya Ubungo inatarajia kukusanya/kupokea fedha kiasi cha shilingi 122.709,193,316.00 Kati ya fedha hizo shilingi 91,123,062,838.00 ni Ruzuku kutoka Serikali Kuu, shilingi 31,086,130,478.00 ni fedha za makusanyo ya ndani ya Halmashauri, na Shilingi 500,000,000.00 ni michango ya Wananchi.

Kyomo ameendelea kueleza kuwa Fedha za Ruzuku kutoka Serikali Kuu Shilingi 91,123,062,838.00 zinajumuisha kiasi cha shilingi 74,207,667,838.00 ikiwa ni Mishahara, kiasi cha shilingi 1,349,442,000.00 kwa ajili ya matumizi mengineyo na shilingi 15,565,953,000.00 kwa ajili ya Miradi ya Maendeleo toka Serikali Kuu.

Huku shilingi 31,086,130,478.00 ambazo ni fedha za mapato ya ndani ya Halmashauri zinajumuisha kiasi cha Shilingi 17,352,877,778.00 kuwa ni fedha za matumizi mengineyo na shilingi 13,733,252,700.00 kwa ajili ya utekelezaji wa miradi ya Maendeleo huku shilingi 500,000,000.00 zikiwa ni nguvu za wananchi.

Sambamba na hayo Kyomo ameeleza kuwa katika bajeti hiyo Manispaa ya Ubungo imependekeza maeneo ya kipaumbele matano yatakayozingatiwa ikiwemo Kuboresha makusanyo ya mapato ya ndani, Kuboresha huduma za kijamii katika sekta ya Afya na Elimu, Kuboresha miundombinu ya barabara, Kuimarisha utawala bora na Kuimarisha usimamizi, ufuatiliaji na utoaji taarifa za utekelezaji wa shughuli za maendeleo.

Kwa upande wake Mwenyekiti wa Baraza hilo ambae pia ni Mkurugenzi wa Manispaa hiyo Ndg Elias Runeye Ntiruhungwa amesema makisio ya bajeti hiyo yamezingatia stahiki zote za watumishi ili kuweza kuwaongezea ari katika utekelezaji wa majukumu yao na hivyo kuweza kutoa huduma stahiki kwa wananchi.