BODI YA AFYA MANISPAA YA UBUNGO YAPONGEZA UTOAJI MZURI WA HUDUMA ZA AFYA KATIKA VITUO

Posted on: October 26th, 2023

Bodi ya Afya manispaa ya Ubungo imepongeza utoaji mzuri wa huduma za afya  katika vituo kupitia waganga wafawidhi wanaosimamia vituo hivyo kwa kuwa na ufanisi mzuri na kusimamia utekelezaji wa miradi kwa weledi

Pongezi hizo zimetolewa na Mjumbe wa bodi hiyo Ndg. Francis Kyando alipozungumzia kuhusiana na  ziara iliyofanywa na wajumbe wa bodi hiyo kutembelea katika vituo vya Afya  na kufanikiwa kupata  taarifa zilizokamilika na kufurahishwa na taarifa za ujenzi wa kituo cha afya kimara ambapo kituo hicho pia kilipongezwa kwa  utoaji  mzuri wa huduma kwa wananchi 

Kikao hicho cha Bodi ya Afya kwa robo ya kwanza Julai-Septemba 2023/2024 kimefanyika leo tarehe 26 oktoba,2023 ambapo wajumbe walipokea taarifa ya utekelezaji wa Idara ya Afya ,lishe na ustawi wa jamii.

Akisoma taarifa ya utekelezaji kwa Idara hiyo Dkt.Catherine  Saguti alisema kuwa kwa kipindi cha robo ya kwanza Idara ya Afya  ilifanikiwa kutoa  chanjo  katika vituo vyote 60 vinavyotoa huduma ya chanjo na pia ilifanikiwa Kuibua wagonjwa wa vifua vikuu ambapo jumla ya wagonjwa 170,322 waliofika katika vituo vya kutolea huduma ya afya walipatiwa elimu kuhusu kifua kikuu na ukoma 

Aliendelea kusema kuwa,  Idara imefanikiwa kupunguza vifo vya wazazi na watoto wachanga ambapo mafunzo elekezi ya huduma ya dharula ya uzazi yalifanyika kwa wataalam wabobezi katika zahanati 9 

Na kupitia Ofisi ya Ustawi wa jamii walihakikisha wazee wanatambuliwa toka kata zote 14 na wanapatiwa  vitambulisho vya msamaha wa matibabu ambapo jumla ya wazee 38 wanawake 16 na wanaume 22 walitambuliwa na kufanikiwa kushughulikia  mashauri 157 ya ndoa

Katika swala la lishe huduma za lishe mtambuka zilifanyika ikiwemo kutoa elimu ya ulishaji wa chakula mchanganyiko kwa  wazee/wazazi wenye watoto wa umri wa miezi 0-23 katika jamii kupambana na udumavu, matibabu ya utapia mlo  kwa watoto chini ya miaka mitano ambapo jumla ya watoto 14  waligundulika na utapia mlo nakupewa matibabu ya awali

Na katika Afya na Mazingira pia Idara ilifanikiwa kudhibiti usalama wa ubora wa chakula,vinywaji na malazi kwenye jamii.