BODI YA AFYA MANISPAA YA UBUNGO YATEMBELEA MIRADI NA HUDUMA ZA AFYA ZITOLEWAZO

Posted on: July 6th, 2023

Katika kuhakikisha Wananchi wanapata huduma bora na usimamizi mzuri wa miradi, Julai 6, 2023 Bodi ya Afya imetembelea Zahanati, Vituo vya Afya na Hospitali ili kujionea hali ilivyo.

Ziara hiyo iliongozwa na Mwenyekiti wa Bodi hiyo Bwn. Allan Sempoli ambapo aliambatana na Makamu Mwenyekiti wa Bodi hiyo Bwn. Israel Sosthenes. Mwenyekiti wa Huduma za jamii ambaye pia ni Diwani wa Kata ya Mbezi Mhe. Ismail Malata, Katibu wa Bodi ambaye ni Mganga Mkuu wa Manispaa hiyo Dkt. Tulitweni Mwinuka na Wataalamu wengine kutoka Manispaa hiyo.

Ikiwa katika Zahanati ya Mavurunza, Kata ya Kimara kamati iliweza kujionea huduma mbalimbali zitolewazo katika Zahanati hiyo zikiendelea vizuri. Pia Bodi ilielezwa kuwepo kwa ujezi wa Shule mpya ya Msingi katika eneo hilo la Zahanati. Lakini baadae Bodi ilipata maelezo kutoka kwa Mwalimu Mkuu wa Shule ya Msingi Golani juu ya eneo hilo, Mwenyekiti wa Bodi alisema hapingi ujenzi wa Shule anaunga mkono na kupongeza juhudi zinazofanywa na Serikali ya awamu ya sita.

Bodi pia ilifika katika Hospitali ya Wilaya na iliridhishwa na huduma zitolewazo, Hospitali hiyo yenye watumishi 66 ikiwa na huduma zote za msingi. Bodi ilipongeza juhudi zifanyikazo katika kuhakikisha huduma zitolewazo zinakuwa bora sambamba na hilo Bodi hiyo ilipongeza uwepo wa Kiti kwaajili ya huduma za Meno kilichonunuliwa kwa mapato ya Hospitali hiyo.

Bodi ilihitimisha ziara yake katika kituo cha afya Mbezi, kituo ambacho kilianza rasmi mwaka 1976. Kituo hicho kipo katika uendelezwaji,  kikiwa na miradi miwili, mradi wa ujenzi wa Hodi ya wazazi na ujenzi wa jengo la upasuaji. Bodi ilipongeza juhudi zinazofanywa katika kituo hicho kinacho hudumia mitaa nane inayounda kata ya Mbezi na kwa siku kinahudumia wastani wa wagonjwa 400 hadi 550 na huduma zinatolewa masaa 24.