CAMFED KUSAIDIA WATOTO WA KIKE WANAOISHI MAZINGIRA HATARISHI UBUNGO

Posted on: March 31st, 2022

Kamati ya CAMFED Wilaya  ya Ubungo yenye wajibu wa kusaidia watoto wa kike wanaoishi katika mazingira hatarishi,  leo Machi 31, 2022 imekutana na kufanya kikao kazi kwa ajili ya kujengewa uelewa wa majukumu yake ikiwemo kuhamisha jamii kuchangia  mahitaji muhimu kwa watoto wa kike wanaoishi mazingira hatarishi.

Kupitia kikao hicho kilichoongozwa na wataalamu kutoka shirika la CAMFED, kamati ina wajibu wa kusimamia mchakato wa kuwatambua watoto hao kwa kuzingatia kigezo cha kuishi katika mazingira  hatarishi ili wawe wanufaika na mradi huo unaofadhiliwa na shirika CAMFED ambapo watasaidiwa mahitaji Maalumu ikiwemo vifaa vya shule, Sare na nauli ya kwenda shule na hivyo kufurahia masomo kama watoto wengine.

Kwa Wilaya ya Ubungo, Jumla ya shule 10 za Sekondari  zitanufaika na mradi huo ambapo pamoja na wanafunzi hao kupata ufadhili wa mahitaji Mhimu ya shule lakini pia watapata huduma ya ushauri wa kisaikolojia na Elimu ya afya  ya uzazi 

Katika kufanikisha kazi hii, Kamati ya CAMFED Wilaya itasaidiwa  na Kamati za shule na walimu walezi katika shule hizo ambao wanachaguliwa na wanafunzi wenyewe kutokana na kukubalika na wanafunzi  na  uwezo wa kusikiliza na kutatua changamoto zao kwa haraka.