CHUKI NI UGONJWA HATARI UNAOWEZA KUSABABISHA KIFO KWA HARAKA

Posted on: November 20th, 2025

Mtaalamu wa afya bora ya akili na maendeleo ya binadamu, Dkt. Mayrose Kavura Majinge amesema chuki ni ugonjwa hatari unaoweza kusababisha kifo kwa binadamu na kwamba ili mwanadamu awe na ustawi kamili ni lazima awe na afya bora ya akili akisema kuwa kila mtu anapaswa kuzingatia faida na hasara kabla ya kufanya uamuzi juu ya jambo lolote.

Akizungumza na watumishi mbalimbali wa Mnispaa ya Ubungo  Novemba 20, 2025, Dkt. Mayrose amesema uwezo wa mtu kuchanganua mambo kabla ya kutenda ndio unaoonesha uimara wake katika afya bora ya akili.

Amesema tabia ya kuchukiachukia haraka, kufanya maamuzi kwa haraka na hasira au kusubiri dakika za mwisho wakati mwingine husababisha madhara yasiyokuwa ya lazima, hivyo ni vyema kujenga utamaduni wa kutafakari kabla ya kuchukua hatua kwaajili ya ustawi wa maisha ya mtu.

Aidha, amesema mtu anaweza kuwa na afya ya akili lakini isiwe bora, jambo ambalo linaathiri ustawi wake wa kila siku.

“Kila mtu anakutana na changamoto zinazohusiana na afya ya akili, na changamoto hizo ni sehemu ya maisha kwa kuwa kila binadamu hukabiliana na hali mbalimbali zinazoweza kuvuruga utulivu wa akili” -alisema Dkt. Majinge.

Dkt. Majinge amefafanua kuwa afya bora ya akili ni uwezo wa mtu kukidhi mahitaji yake ya kimaisha na kimwili, na pale ambapo mtu anashindwa kutimiza mahitaji hayo ni dalili kuwa akili yake inakabiliwa na changamoto.

Amesisitiza kuwa kama ilivyo muhimu kwa mwanadamu kuwa na afya bora ya mwili, ndivyo ilivyo muhimu pia kuwa na afya bora ya akili na kwamba afya bora ya akili ni hitaji la kila mtu.