CWT UBUNGO YAWAPIGA MSASA WALIMU NA WARATIBU WA ELIMU KATA

Posted on: February 10th, 2022

Chama cha walimu Ubungo kwa kushirikiana na Manispaa ya Ubungo leo tarehe 10/02/2022 kimekutana na maafisa elimu kata na walimu wakuu wa shule za msingi na sekondari lengo ikiwa ni kuwapa mafunzo ya kuwa viongozi bora kwa maana ya kuboresha na kuongeza ufaulu mashuleni.

Katibu wa chama cha walimu Ubungo, Maisa Joseph amewataka walimu hao kuwa na uongozi bora na mawasiliano mazuri baina yao na wanaowasimamia ili kuongeza ufaulu kwa wanafunzi na kuiwezesha kuwa katika ufaulu wa kumi bora Nchini.

Kaimu Mkurugenzi wa Manispaa ya Ubungo, Selemani Kateti (Mkuu wa Idara ya Utumishi na Utawala) amekipongeza chama cha walimu kwa namna wanavyoweza  kushirikiana vyema na serikali katika kuhakikisha maslahi ya walimu wanafuatwa na amewaomba wawe na ofisi ndani ya Manispaa ili kuendelea kushirikiana vizuri zaidi.

Kateti amewasisitiza walimu na waratibu hao wa elimu kuwajibika ipaswavyo katika kutekeleza majukumu yao na kuwajibika katika kusimamia miradi mbalimbali ya maendeleo katika shule zao kwa kushirikisha walimu na wadau wengine shuleni hapo. Na kuwasimamia walimu wanaowasimamia kutimiza majukumu yao ipaswavyo.

“Kunawajibu kama kiongozi katika kusimamia majukumu yako ukiwa kama kiongozi wa serikali wa eneo Fulani.”

Aidha Kateti ameeleza kwamba katika kuhakikisha maslahi ya walimu yanafuatwa atahakikisha kila mtumishi mwenye sifa za kupanda daraja, kubadilishwa muundo yote yatafanyika sambamba na ubadilishwaji wa mishahara ili kuepuka malimbikizo kwa watumishi, na kuwaondolea mlolongo mrefu wa kupitishiwa fomu za mikopo.

Kateti amewataka walimu hao kuhakikisha taaluma inapanda kwa kuhakikisha ufaulu unaongezeka mashuleni na hicho ni kipimo cha kupima uwajibikaji wao katika kutekeleza majukumu yao, Pia amewataka walimu hao kuipa nguvu benki ya walimu ambayo ni kama wameisahau.

 Naye Mjumbe wa Kamati ya Utendaji Taifa ya chama cha walimu Mwalimu Nelson Mabula amempongeza Mkuu wa Idara ya Utumishi na Utawala kwa namna anavyojali maslahi ya watumishi na ameeleza kuwa walimu wote ambao walinyang’anywa vyeo serikali inaangalia namna ya kuwarudishia vyeo hivyo na amewataka walimu kufanya kazi kwa weledi kwa maslahi ya Umma.

Nae mwakilishi wa Tume ya Utumishi wa Walimu (TSC) ya Wilaya Fides G Tairo ameeleza kuwa tume imejikita katika kusimamia nidhamu kwa walimu, na kwamba ameeleza mwalimu Mkuu ana mamlaka ya kumpa mwalimu anaemsimamia adhabu kwa kuzingatia kanuni, sheria na taratibu za Nchi, ili kuimarisha utaendaji kazi wao kwa maslahi ya Taifa.