DARAJA LA MSUMI KUJENGWA KUPITIA MRADI WA DMDP

Posted on: January 31st, 2024

Kufuatia agizo la Mhe. Rais wa Jamhuri ya Muungano wa Tanzania Dkt. Samia Suluhu Hassan la kuhakikisha miundombinu yote iliyoharibiwa na mvua zinazoendelea kunyesha inarekebishwa na kuwa kwenye hali yake hususani miundombinu ya barabara.

Leo tarehe 31/01/2024 Mkuu wa Wilaya ya Ubungo Mhe. Hashim Komba amefanya ziara ya kutembelea Kata ya Mbezi Mtaa wa Msumi eneo la kivuko cha waenda kwa miguu na vyombo vya moto kilichoharibiwa na mvua zinazoendelea kunyesha na kupelekea kupoteza mawasiliano baina ya wakazi wa Wilaya ya Ubungo na Kinondoni.

Akiongea wakati wa ukaguzi huo Mhe. Komba amewaagiza watendaji Kata wa Wilaya hiyo ambao mito imepita kwenye maeneo yao kuhakikisha wananchi wa maeneo yao wanapata elimu juu ya madhara yanayotokea kutokana na uchimbaji holela wa mchanga sambamba na kufanya mikutano ya wananchi pindi wachimbaji wa mchanga wanaofuata utaratibu watakapojitokeza, pia amewataka wananchi kutoa taarifa pale ambao watabaini uchimbaji holela wa mchanga.

Aidha, Mhe Komba ameeleza kuwa kutokana na uharibifu wa kivuko hicho TARURA itajenga kivuko kingine cha waenda kwa miguu pekee kitakachotumika kwa muda huku njia mbadala ya kupita vyombo vya moto itakayounganisha wakazi wakazi wa maeneo hayo ikifanyiwa marekebisho na kuanza kutumika.

Akifafanua sababu ya kujenga kivuko cha muda cha waenda kwa miguu pekee Mhe. Komba ameeleza kuwa Serikali kupitia mradi wa ‘Dar es salaam Metropolitan Development Projects’ DMDP inampango wa kujenga barabara kiwango cha lami zaidi ya Kilomita 52 na miongoni mwa barabara hizo ni barabara ya Msumi ambayo itajengwa kuanzia Njia panda ya Makabe hadi Tegeta.

Mhe. Komba ameeleza kuwa ujenzi wa barabara hiyo upo mbioni kuanza na utajumuisha ujenzi wa kivuko hicho hivyo amewataka wananchi kuendelea kuwa wavumilivu kwa kipindi chote watakachokuwa wakitumia kivuko cha muda na njia mbadala.

“Mradi huo kwa awamu ya pili utaenda kujenga kingo za mito, kuboresha miundombinu ya kiuchumi ikiwemo masoko sambamba na uboreshaji wa baadhi ya miundombinu hakika pongezi nyingi zimuendee Rais Dkt. Samia Suluhu Hassan kwa kutuletea mradi huu muhimu” aliongeza Mhe. Komba