DC BOMBOKO AWEKA MSIMAMO WAKE UBUNGO

Posted on: March 26th, 2024

Mkuu wa Wilaya ya Ubungo Mhe. Hassan Bomboko leo machi 26, 2024 amekutana na kufanya kikao kazi na Wakuu wa Idara na Vitengo, Maafisa Tarafa na Wakuu wa Taasisi lengo ikiwa ni kujitambulisha na kutoa msimamo wake kwa viongozi hao katika kutekeleza majukumu ya kuisimamia serikali katika kuwahudumia wananchi Wilayani humo.

Kupitia kikao hicho Mhe. Bomboko amewapongeza viongozi hao kwa kazi kubwa wanayoifanya ya kuhudumia wananchi katika sekta mbalimbali na kuwasisitiza kuzingatia uadilifu na uaminifu, uzalendo na uungwana uwajibikaji na uchapakazi uweledi na ubunifu pamoja na kufanya ufuatiliaji na usimamizi wa sekta zao kwa umakini mkubwa kwani ndio misingi ya muhimu kwa watumishi wa umma.

Mhe. Bomboko ametumia kikao hicho kuwaeleza viongozi hao kuwa katika kipindi chake cha uongozi wilayani humo atasimamia eneo la usikilizaji na utatuzi wa kero za wananchi ambapo kila mtumishi kuanzia ngazi ya mtaa katika sekta yake anapaswa kutenga muda wa kufanya jukumu hilo ili kupunguza malalamiko kwa wananchi ambayo yanapunguza imani ya wananchi kwa serikali yao.

Mhe Bomboko “Sitafurahi kuona wananchi wanashindwa kupata majibu ya kero zao wakati tuna wataalamu kuanzia ngazi ya mtaa au kwenda kulalamika kwenye vyombo vya habari au mamlaka za juu wakati uwezo wa kutatua upo”

Usimamizi wa miradi ya maendeleo, ukusanyaji wa mapato na uimarishaji utoaji huduma bora kwa wananchi ni moja ya agenda ambazo Mhe. Bomboka atazisimamia kikamilifu ili wananchi wafurahie maendeleo makubwa yanayofanywa na Serikali yao ya awamu ya sita chini ya Rais Dkt. Samia suluhu Hassan.

Akiongea kwa niaba ya viongozi hao Kaimu Mkurugenzi wa Manispaa ya ubungo Voster Mgina amemshukuru Mkuu wa Wilaya kwa kikao kizuri cha utambulisho na maelekezo na kuahidi kuyasimamia kwa vitendo maelekezo hayo kwa weledi na ubunifu mkubwa.