DC KOMBA AFANYA ZIARA STAND YA MAGUFULI NA KITUO CHA DALADALA MBEZI

Posted on: April 27th, 2023

Mapema leo April 27, 2023 mkuu wa wilaya ya Ubungo akiwa ameambatana na kamati yake ya ulinzi na usalama pamoja na wataalamu kutoka Halmashauri ya Manispaa ya Ubungo katika ukaguzi wa hali ya mazingira kwenye kituo cha mabasi cha Magufuli pamoja na kituo cha daladala Mbezi mwisho

Ziara hiyo ilikua imelenga kukagua hali ya mazingira yanayozunguka maeneo hayo na kutathmini kwa pamoja njia stahiki za kufanya ili kuondokana na changamoto zote za uchafu wa mazingira zilizobainika katika eneo hilo

Akiongea baada ya kukamilisha ziara hiyo, Komba ameonesha wazi kutoridhika na hali ya usafi wa mazingira kwa maeneo hayo. Hali hiyo imetokana na wingi wa biashara zinazofanyika katika maeneo yasiyo rasmi, madampo bubu, uwepo wa vyoo hovyo na utupaji taka ovyo. 

Tayari Mhe. Komba ametoa maelekezo ya kupigwa faini watu wote wanaofanya biashara kwenye maeneo yasiyo rasmi, lakini pia kubomoa vyoo vilivyojengwa bila kufata utaratibu pamoja na kusafisha eneo lote kituo cha daladala Mbezi mwisho mpaka kufikia saa 12 jioni.

"Wilaya ya Ubungo ndo lango la jiji la Dar es Salaam ambapo ndani yake kuna kituo cha mabasi cha Magufuli ambacho ni kituo cha kimataifa, hatuwezi kuvumilia kufanya mambo kiholela na kuchafua mazingira kama hali ilivyo kwasasa" alisema Komba

Aidha kwa upande mwingine, Mhe. Komba amepiga marufuku maeneo yote yasiyo rasmi ya kukatisha tiketi za mabasi ya mikoani na amewaelekeza maafisa wa jeshi la polisi kuwachukulia hatua za kisheria wale wote ambao wanatumika kuwatapeli abiria hasa nyakati za asubuhi