DC KOMBA AKABIDHI MADAWATI, VITI NA MEZA MASHULENI

Posted on: February 19th, 2024

Mkuu wa Wilaya ya Ubungo Hashim Komba amezielekeza Kamati za Shule wilayani humo kuwa na Utamaduni wa kufanya ukarabati wa madawati yaliyochakaa ili kupunguza changamoto zinazoweza kujitokeza, ikiwemo wanafunzi kukaa chini kutokana na uchakavu wa Madawati hayo, badala ya kusubiri Ujenzi wa Madawati mapya yenye mchakato mrefu.

DC Komba ametoa maelekezo hayo wakati wa kukabidhi Madawati 100 Kwa Shule ya Msingi Makoka ambayo Ina Upungufu wa Madawati 140, hali iliyotokana na ongezeko kubwa la wanafunzi katika Shule nyingi za Msingi za Serikali, kutokana na Sera ya elimu bure.

"Nimepita leo kujiridhisha kuona kama maelekezo ya Mhe. Rais Samia Suluhu Hassan yanafanyiwa kazi ya kutaka watoto wetu wasikae chini, wakati tunakagua maandalizi ya kupokea wanafunzi kwa mwaka 2024 tulikubaliana kwa upande wa Idara ya Elimu Sekondari kuchonga Viti na Meza 7,339, Kwa upande wa Idara ya Elimu Msingi tulikubaliana kuchonga Madawati 4,000," Alisema Mhe. Komba.

Mhe. Komba amekabidhi Madawati 100 Kwa Shule ya Msingi Makoka, Viti na Meza 200 kwa Shule ya Sekondari Mugabe iliyopo Sinza na kutembelea katika karakana zinazotengenezewa Viti hivyo na Madawati ambapo mkandarasi anaendelea na Ujenzi, huku akitoa maelekezo ya kwamba kasi ya ujenzi huo iongezeke.

Akizungumza baada ya kukabidhiwa Madawati hayo Afisa Elimu Msingi Manispaa ya Ubungo Dennis Nyoni amesema hadi Sasa Madawati 1,660 ya yameshasambazwa kwenye Shule mbalimbali za Msingi Kwa awamu ya kwanza Kwa kushirikiana na wadau mbalimbali na kwa awamu ya pili yatatengenezwa zaidi ya Madawati 7,000, huku Shilingi Milioni 500 zikiwa zimetengwa kwa awamu hiyo ya kwanza, na mwaka wa Fedha ujao imetengwa Milioni 700 itakayosaidia zaidi ya wanafunzi 16,000 walioandikishwa kupata mazingira bora ya kusomea.

Kwa upande wake, Afisa Elimu Sekondari Manispaa ya Ubungo Voster Mgina amesema jumla ya Shule 36 ambazo Zina wanafunzi 41,200 katika Manispaa hiyo, zilikuwa na Upungufu wa Viti na Meza 17,000, lakini Manispaa kwa awamu ya kwanza imetengua Milioni 700 kwa ajili ya Viti na Meza 7,339, na Hadi Sasa Viti na Meza 2,700 Vimekamilika na kusambazwa.