DC KOMBA AKUTANA NA VIONGOZI WA SERIKALI ZA WANAFUNZI WA VYUO VIKUU VILIVYOPO WILAYA YA UBUNGO

Posted on: May 11th, 2023

Mkuu wa Wilaya ya Ubungo Mh. Hashim Komba leo Mei 11, 2023 amekutana na viongozi mbalimbali wa serikali za wanafunzi kutoka vyuo vyote vinavyopatikana ndani ya wilaya ya Ubungo

Vyuo hivyo ni pamoja na chuo kikuu cha Dar es Salaam (UDSM), Chuo cha Maji, Chuo cha Usafirishaji (NIT) pamoja na chuo cha St. Joseph.

Lengo kuu la kukutana nao kwanza ilikua ni mkuu wa wilaya kujitambulisha kwao, lakini pia kuwakumbusha nafasi ya viongozi hao kwenye kushiriki kuendelea kuifanya wilaya ya Ubungo kuwa yenye amani na utulivu pamoja na kusisitiza suala zima la maadili vyuoni kote huko

Awali akiongea katika kikao hicho Mh. Komba amewapongeza viongozi hao kwa nafasi walizopata kutoka kwenye vyuo vyao kuwa viongozi hivyo wanatakiwa kuitumia nafasi hiyo vema kwa maslahi mapana ya wale wanaowaongoza ili watengeneze uongozi wenye kuacha alama.

Pia amewakumbusha umuhimu wa kuwa na malengo na kuwa tayari kulipa gharama zote za kuyafikia malengo hayo ikiwa ni pamoja na juhudi, uvumilivu na nidhamu.

"Katika Maisha kwanza unatakiwa uwe na dira, uwajibikaji, nidhamu pamoja na kumtanguliza Mungu. Hizo ndio silaha kubwa kwa yoyote yule kufikia malengo yake kwani kila kitu kinawezekana" alisema Komba

Vilevile Mh. Komba ametumia fursa hiyo kuwaasa viongozi hao umuhimu wa kuandaa makongamano ya maadili katika vyuo vyao ili kusaidia kuondoa changamoto zote za maadili zinazoibuka miongoni wa wanavyuo.

Nao viongozi wa vyuo hivyo walioalikwa wamemshukuru mkuu wa wilaya kwa fursa hiyo ya kukutana nao na wameahidi kwenda kutekeleza yote waliyoshauriwa ili kuleta matokeo chanya ya mazingira ya kujifunzia katika vyuo vyao na maisha kwa ujumla