DC KOMBA AKUTANA NA WAKUU WA SHULE, WALIMU WAKUU NA WADHIBITI UBORA KUJADILI HALI YA ELIMU UBUNGO

Posted on: March 20th, 2023

Mkuu wa Wilaya ya Ubungo Mhe. Hashim Komba ameagiza kuanza kufanyika maandalizi ya kongamano kubwa la wadau wa Elimu wilaya ya Ubungo muda mfupi kutokea sasa.

Hayo yamesemwa leo Machi 20, 2023 katika ukumbi wa Manispaa ya Ubungo wakati akiongea na wakuu wa shule za sekondari, walimu wakuu wa shule za msingi, waratibu elimu pamoja na wadhibiti ubora katika kikao ambacho kililenga kufanya tathmini ya hali ya elimu kwa Wilaya ya Ubungo

Lengo la kongamano hilo kubwa ni kuweka mikakati ya kuchochea kiwango cha elimu kwa shule za msingi na sekondari pamoja na kutafuta majawabu ya changamoto za miundombinu ya elimu kama vile viti, meza, vyumba vya madarasa na matundu ya vyoo

"Hatma ya taifa lolote duniani inaegemea elimu. Walimu mna uwezo kubadilisha kiwango cha elimu kwa wilaya yetu endapo tu mtatimiza wajibu wenu na kuacha kufanya kazi kwa mazoea" alisema Komba

Awali akiwasilisha taarifa ya ufaulu kwa shule za sekondari, Afisa elimu wa Manispaa ya Ubungo Ndg. Voster Mgina amesema kiwango cha ufaulu kwa shule za sekondari Manispaa ya Ubungo umeendelea kukua pamoja na uwepo wa changamoto kadhaa ikiwemo ya upungufu wa walimu wa masomo ya sayansi (Hisabati na Fizikia)

Aidha kwa upande wa shule za msingi Afisa elimu msingi Ndugu Nyoni amesema kuwa kiwango cha ufaulu kwa shule za msingi kwa mwaka 2022 umepanda kwa asilimia 0.62 na kufikia kiwango cha ufaulu cha asilimia 96.74

Vile vile Mhe. Komba ametumia kikao hicho kuendelea kuweka zuio la kufanya michango katika shule za msingi na sekondari bila kufata utaratibu. Vibali vyote vya michango kwenye shule ni lazima vipitishwe na Mkuu wa Wilaya mwenyewe.

Vibali ambavyo vitaruhusiwa ni vile tu vilivyokidhi vigezo ikiwemo sharti la mchango wowote lazima uibuliwe na wazazi husika, kitu kinachoombewa mchango ni lazima kiwe na mahesabu halisia pamoja na kuwa na ukomo wa mchango.

Kibali pekee ambacho Mhe. Komba amekiruhusu ni mchango wa chakula pekee.