DC KOMBA ATAKA VIONGOZI WA SERIKALI NA CHAMA KUSHIRIKIANA VYEMA

Posted on: March 23rd, 2023

Mkuu wa Wilaya ya Ubungo Mhe. Hashim Komba amewataka Watumishi na Viongozi wa Kisiasa wa Halmashauri ya Manispaa hiyo kushirikiana vyema katika kutekeleza majukumu yao kwa maslahi ya wananchi wa Wilaya hiyo.

Hayo ameyasema leo tarehe 23 Machi, 2023 wakati wa kikao kazi kilichojumuisha Viongozi mbalimbali wa Chama cha Mapinduzi CCM wakiwemo Madiwani, Wenyeviti wa Chama, Makatibu wa chama, Makatibu wa Siasa na uenezi wa chama ngazi ya Kata pamoja na Watendaji Kata wa Halmashauri hiyo lengo ikiwa ni kuboresha mahusiano mazuri baina yao.

Mhe. Komba ameendelea kueleza kuwa katika kuwahudumia wananchi ni muhimu kuwa na mtazamo mmoja baina ya chama na Serikali ili kuhakikisha wananchi wanapata huduma bora na stahiki kama ambavyo ilani ya chama inaelekeza.

“Naomba msiwe kikwazo cha kuichonganisha Serikali na wananchi wake fanyeni kazi kwa weledi kwa kuzingatia sheria kanuni na taratibu” Alisema Komba.

Aidha, Mhe Komba amezitaka taasisi zinazofanya kazi chini ya Wilaya hiyo ikiwemo TARURA, DAWASA na TANESCO kuhakikisha wanatoa huduma stahiki kwa Wananchi ikiwa ni pamoja na kutatua chagamoto zote ambazo zinaweza kijitokeza wakati wa utoaji wa huduma hizo.

Kwa upande wake Mhe. Mbowe Mwenyekiti wa chama wa Wilaya hiyo amempongeza Mkuu wa Wilaya kwa jitihada anazozifanya ili kuhakikisha wananchi wa wilaya hiyo wanapata huduma stahiki na kuwataka viongozi hao kujiepusha na migogoro wakati wa utekelezaji wa majukumu yao.

Nae Mhe. Juma Jaffary Nyaigesha Mstahiki Meya wa Manispaa hiyo amesema mahusiano yataendelea kuboresha baina ya chama na Serikali na kwamba maelekezo yote ya Mkuu wa Wilaya yatasimamiwa na kufanyiwa kazi kama ambavyo ameelekeza kwa maslahi ya Wananchi na Taifa kwa ujumla.