DC KOMBA ATEMBELEA KITUO CHA KULEA WATOTO YATIMA -GOBA

Posted on: February 4th, 2023

Ili tuwe na jamii bora yenye upendo na uzalendo ni lazima kila mmoja wetu ajenge utamaduni wa kugusa maisha ya mtoto asiye wa kwake. Hayo yamesemwa na Mkuu wa Wilaya ya Ubungo Mhe. Hashim Komba alipotembelea kituo cha kulea watoto yatima cha Huruma Children's Home kilichopo kata ya Goba 

Akizungumza katika shughuli hiyo Mhe. Komba amesema ameamua katika shughuli yake rasmi ya kwanza nje ya ofisi, ameamua awatembelee watoto hawa ili kuwafariji na kuwapa matumaini kwa maisha wanayoyapitia hivi sasa pamoja na kutoa msaada wa mahitaji yao ya msingi. 

"Nilitafakari maisha yetu binadamu na maisha yangu mwenyewe. Mimi ni matokeo ya kusomeshwa pamoja na kusaidiwa na watu wasiokua ndugu zangu kwa asilimia 100. Niliona nitumie fursa hii napoanza kazi za nje kwa wilaya ya Ubungo niende kwa watu wanaopita kwenye historia kama ya kwangu" Alisema 

Katika ziara yake Mhe. Komba amekabidhi msaada wa Magodoro 7, Mchele kilo 100, Sukari kilo 25 pamoja na sabuni. Nae mwenyekiti wa CCM wilaya ya Ubungo Mhe. Mbowe amemuunga mkono mkuu wa wilaya kwa kuahidi kulipa gharama ya maji katika kituo hicho kwa miezi 3 ambapo kwa mwezi ni shilingi laki sita 

Nae Dibogo Willian Mkurugenzi wa kituo cha Huruma Children's Home wakati akieleza historia ya kituo hicho amesema, kituo kilianza mwaka 2006 kikiwa na watoto 16 na hivi sasa kina watoto 26 wawili wakiwa ni wanafunzi wa chuo kikuu ngazi ya shahada na watatu wakiwa ngazi ya stashahada.

Pia ndg. William ametumia fursa hiyo kueleza changamoto kuu za kituo hicho ambazo ni changamoto ya maji pamoja na kukosa usafiri wa kituo ambapo Mhe. Komba amesema kuwa amezipokea changamoto hizo na kuahidi kuzifanyia kazi 

Aidha Diwani wa Kata ya Goba Mhe. Easther Ndoha amemshukuru sana Mhe. Komba kwa kuichagua kata ya Goba kuwa sehemu ya kwanza kuitembelea toka alipohamishiwa wilaya ya Ubungo 

ReplyForward