DC TWANGE AFANYA ZIARA KWENYE MIRADI YA ELIMU SEKONDARI. ATOA MAAGIZO KWENYE UWAJIBIKAJI WA PAMOJA

Posted on: March 11th, 2025

Mkuu wa Wilaya ya Ubungo Mhe. Lazaro Twange amesema kuna kazi kubwa ya kufanya  kwa wasimamizi wa miradi ya maendeleo hasa kwenye eneo la mawasiliano ili  kuwa na uwajibikaji wa pamoja katika kuhakikisha miradi hiyo inatekelezeka kwa wakati

DC Twange ametoa Kauli hiyo leo Machi 10, 2025 wakati wa ziara ya kukagua miradi ya sekta ya elimu sekondari na  kubaini uwepo wa changamoto ya utoaji na upokeaji wa taarifa za utekelezaji wa miradi kuanzia ngazi  ya Halmashauri mpaka ngazi ya vituo vya kutolea huduma zikiwemo shule.

Ili kukabiliana na changamoto hiyo, DC Twange amesema kutafanyika kikao cha pamoja na wataalam wa ngazi ya Manispaa, kata Mitaa na vituo vya kutolea huduma ili kuweka mkakati wa pamoja wa namna bora na shirikishi ya kusimamia miradi na utoaji wa taarifa ya utekelezaji wa miradi kwa wakati

Katika ziara hiyo aliyotembelea miradi ya Elimu sekondari ikiwemo ujenzi madarasa, matundu ya vyoo, maabara na nyumba za walimu katika shule za Sekondari Ubungo NHC, YR Makamba, Makabe na Kulangwa ipo katika hatua za awali, umalizaji na mingine haijaanza kabisa kutokana na sababu mbalimbali

Mhe. Twange pia amebaini kuwa, changamoto ya uelewa wa mfumo mpya wa manunuzi na upatikanaji wa wakandarasi wenye uwezo wa kifedha ni moja ya sababu kubwa iliyosababisha miradi mingi kutokamilika kwa wakati

Mhe. Twange  ameeleza kuwa "Kuna baadhi ya miradi imetangazwa zaidi ya mara kumi na mkandarasi hajapatikana, hali hii imesababisa miradi mingi kuchelewa kuanza kwani baadhi ya shule zimepokea fedha tangu mwezi februari 2024 lakini hawajapata mkandarasi mpaka leo"

Bi mariamu  mkazi wa Kulangwa ameishukuru serikali kwa kujenga shule mpya katika mtaa wao kwani wanafunzi walikuwa wanatembea umbali mrefu kufuata shule lakini pia ni hatari sana kwa watoto wa kike kwani wengi walikuwa wakikutana na vishawishi mbalimbali