DC TWANGE ASIKILIZA NA KUTATUA KERO ZA WANANCHI MSIGANI.

Posted on: February 12th, 2025

Mkuu Wa Wilaya Ubungo Mh. Lazaro Jacob Twange  Februari 12, 2025 amezungumza na Viongozi wa Chama cha Mapinduzi, Wenyeviti wa Mitaa pamoja na Wananchi katika kata ya Msigani ikiwa ni sehemu ya ziara yake anayoifanya ya kusikiliza kero zao mbalimbali. 

Wakizungumza mbele ya mkuu huyo wa Wilaya, baadhi ya wananchi wamemuomba kuwatatulia changamoto za Kivuko, Barabara, Ukosefu wa Maji, na Kituo Cha Afya. 

Wamesema changamoto hizo zimekuwa ni za muda mrefu, hali inayokwamisha juhudi za Serikali ya awamu ya sita ya kuwaletea maendeleo.

Akijibu hoja hizo, Mh. Twange amewataka wananchi kuwa na subira wakati changamoto hizo zikitafutiwa ufumbuzi wa kudumu na kuahidi kushirikiana na Wataalamu ilikuweza kutatua changamoto zao.

"Tunatakiwa kujikita zaidi katika utatuzi wa migogoro ya wananchi iliyopo katika kata na mitaa yetu"

Aidha amewapongeza kwa Kazi nzuri wanayo endelea Kuifanya na kuwataka kuendelea kushirikiana katika Majukumu mbalimbali ili huduma ziweze kuwafikia Wananchi kwa urahisi zaidi. 

Katika hatua nyingine, amemtaka Mhandisi  wa DAWASA Ubungo, Ndg. Adam Masamu kuhakikisha wananchi wanapata huduma ya maji fikapo mwezi wa Tatu mwaka huu.

Ili kufuatilia utekelezaji wake, ameahidi kurudi wiki ya kwanza ya Mwezi wa tatu kujionea huduma ya maji na kufanya mapokezi rasmi ya maji akiwa pamoja na wananchi.