DC TWANGE ATAKA SPIDI YA UMALIZIAJI MIRADI IONGEZEKE, ATOA MAAGIZO

Posted on: March 3rd, 2025

Mkuu wa Wilaya Ubungo Mhe. Lazaro Twange ametoa maelekezo kwa wataalamu wa Manispaa ya Ubungo kuongeza kasi na ukaribu wa kusimamia utekelezaji wa miradi ya ujenzi wa madarasa na matundu ya vyoo katika shule za msingi zilizopo katika Manispaa hiyo ili kutekeleza azma ya Serikali ya kuboresha mazingira ya kujifunza na kujifunzia.

Mhe. Twange ametoa maelekezo hayo machi 3, 2025 wakati wa ziara  ya kukagua na  kutembelea miradi ya sekta ya elimu Msingi  ikihusisha ujenzi wa miundombinu hiyo katika shule  tano katika  Manispaa hiyo.

Mhe.Twange ameeleza kuwa, miradi yote mitano  aliyotembelea haijakamilika kutokana na sababu mbalimbali zikiwemo uwepo wa mfumo mpya wa manunuzi, jiografia  mbaya kwa baadhi ya maeneo  pamoja na makadirio madogo ya gharama za mradi, hivyo amewasisitiza wataalamu kuhakikisha changamoto hizo zinaisha ili miradi hiyo ikamilike na kuanza kutumika kwa wakati

DC Twange amefafanua kuwa " tukumbuke kuwa kwa kipindi cha miaka minne ya Serikali ya awamu ya sita imetoa fedha zaidi ya bilioni 10  kwa ajili ya  uboreshaji wa miundombinu ya sekta ya elimu Msingi, hivyo  Mimi kama kiongozi nitaendelea kuwasimamia wataalamu na wakandarasi  kwa ukaribu ili miradi hiyo muhimu ikamilike na kutumika kwa wakati"

Katika ziara hiyo ambayo ni mwendelezo wa ziara za Mhe. DC wilayani humo,  ametembelea mradi wa ujenzi wa madarasa na matundu ya vyoo katika shule ya Msingi, Kilungule, milenium ya 3, Golani, King'azi "A" pamoja na  shule ya msingi Idrisa ambapo miradi hiyo iko katika hatua mbalimbali za utekelezaji  na inatarajiwa kukamilika ndani ya mwaka wa fedha 2024/2025