DC UBUNGO AZINDUA MFUMO WA ANWANI ZA MAKAZI NA POSTIKODI

Posted on: February 26th, 2022

Mkuu wa Wilaya ya Ubungo Mhe. Kheri James amezindua rasmi mfumo wa Anwani za Makazi katika Wilaya hiyo kwa kuweka vibao vya anwani katika barabara na nyumba zilizopo mtaa wa Goba barabara ya kinzudi Kata ya Goba. 

Uzinduzi huo umefanyika leo Februari 26, 2021, ambapo Mh James  amewatangazia wananchi  hao kuwa zoezi la anwani Kwa Wilaya hiyo  limeanza rasmi  hivyo wananchi watoe ushirikiano mkubwa kwa wakusanya taarifa watakaofika kwenye maeneo yao

 "Zoezi hili  linahusisha wananchi kwa maana ya ushiriki na viongozi kwa maana ya usimamizi hivyo kila mmoja atimize wajibu wake" alisisitiza Mhe. James

Aidha amesema ushiriki wa mwananchi ni wa kutoa taarifa zinazotakiwa kwenye zoezi ikiwemo jina kamili la mmiliki wa nyumba au kiwanja, kitambulisho cha NIDA au namba ya NIDA kwa wale wenye navyo, namba ya kiwanja kwa vile vilivyopiwa, na namba za simu.

“Kila mwananchi anaemiliki nyumba au kiwanja aache taarifa zake kwa mtu anaebaki nyumbani pindi hatakapo kuwa  hayupo na wapangaji wote pia wanapaswa kuwa na taarifa sahihi za wenye nyumba wao ili kurahisisha zoezi kwa wakusanya taarifa.”

DC ametumia fursa hiyo pia kuwa Anwani hizo zitasaidia  kurahisisha mawasiliano, kuwezesha biashara mtandao, kuimarisha ulinzi na usalama na kuwezesha shughuli mbalimbali za kitaifa ikiwemo zoezi la sensa litakalofanyika mwezi agosti mwaka huu 

Katika kuhamasisha viongozi na watendaji wa kata, Mh. James amewaahidi wenyeviti wa mitaa kuwa mtaa na watendaji wa kata kuwa atakaekuwa wa kwanza kumaliza zoezi atazawadiwa fedha taslimu kiasi cha Tsh 500,000/= na mtaa huo utakaokuwa wa kwanza utapewa kipaumbele kwenye miradi mbalimbali ya maendeleo na kwa wale watakwamisha watawajibishwa.

James amesema kwa Mkoa wa Dar es Salaam zoezi hili kwa Wilaya ya Ubungo anapenda kuwa wa kwanza kukamilisha na amewataka viongozi kuwapa ushirikiano wachukua taarifa watakaokuja kwenye mitaa yao na kuwasisitiza zoezi hili likamilike kwa wakati, ufanisi na kuwa wa kwanza kumaliza.

“Nasisitiza zoezi hili ni oparesheni lazima liishe kwa wakati, ufanisi na kuwa wa kwanza kumaliza.” Alisema James.