HUDUMA YA KUJIFUNGUA KWA UPASUAJI YAANZA RASMI KITUO CHA AFYA GOBA,WANANCHI WAKARIBISHWA

Posted on: April 30th, 2025

Ni kwa mara ya kwanza kituo cha afya Goba katika kata ya Goba kimeanza utoaji wa  huduma ya kujifungua kwa upasuaji na  tarehe 30/4/2025 kituo hicho kimefanikiwa kutoa huduma hiyo na mtoto wa kiume amezaliwa

Akisoma taarifa ya uzinduzi wa jengo la huduma ya upasuaji katika kituo hicho ambayo imeanza rasmi leo  baada ya jengo hilo  kuzinduliwa, Mganga Mfawidhi Dkt. Elias Ndahani amesema kuwa jumla ya akinamama ambao mpaka sasa wamejifungua katika kituo hicho ni 194,  afya ya mama na mtoto 34,904 huku wagonjwa wa nje wakifikia idadi ya watu 22,071

 Ukamilikaji wa jengo hilo la upasuaji katika kituo hicho kwa sasa Dkt. Ndahani amesema kuwa huduma ya upasuaji  imeanza rasmi kutolewa  na itakua endelevu na kuwataka wakazi wa kata ya Goba na maeneo jirani kufika katika kituo  kupata huduma hiyo inayotolewa na madaktari wenye ubingwa bobezi.

Akizindua jengo la upasuaji (Theater)  katika kituo hicho Mgeni rasmi Diwani wa kata ya Goba Mhe. Ester Ndoha amesema changamoto katika sekta ya afya katika Kata ya Goba  imeendelea kutatuliwa na Serikali kwa ukubwa ambapo ndani ya miaka minne ya Serikali ya awamu sita mpaka sasa Goba ina kituo cha afya kilichogharimu milioni 756 kwa majengo yaliyopo ikihusisha jengo la maabara,  upasuaji na wagonjwa wa nje

Pia, Mhe. Ndoha ametoa rai kwa Mganga Mkuu kuhakikisha madawa na huduma kwa watoto kupatikana katika kituo hicho kwa weledi ili wananchi waweze kukifurahia kituo hicho kwa huduma bora.