ISAHAU JANA,ITIMIZE LEO KWA MUSTAKABALI WA KESHO-DC KOMBA

Posted on: December 15th, 2023

Ikiwa  Desemba 15, 2023 yamefanyika mahafali katika nyumba ya kulea wahanga wa biashara haramu ya kuuza binadamu katika kituo cha DMI spring of home, mkuu wa wilaya ya Ubungo Mhe. Hashim Komba amewahusia wahitimu kujiamini na kutokukubali kurudi nyuma walipotoka wakati huu wanapoenda kuanza safari mpya ya maisha yao nje ya kituo hicho

Mhe. Komba ameyasema hayo alipokua mgeni rasmi katika mahafali hayo ambayo yamefanyika katika kituo hicho kilichopo Kibamba Manispaa ya Ubungo ambapo jumla ya wahitimu 63 wa fani mbalimbali wamehitimu leo ikiwemo fani ya mapishi, ususi, ushonaji na Tehama

Mhe. Komba amewapongeza wahitimu hao kwa kuwa miongoni mwa washindi walioshinda vita ya manyanyaso, vita ya unyonge, vita ya kufanyiwa biashara haramu ambapo vitendo hivyo vinafanywa na watu wenye tamaa ya fedha na waliokosa utu.

"Kila mmoja aisahau jana, aitizame leo kwa mustakabali wa kesho. Na kila mmoja ajiwekee nadhiri moyoni mwake kutokurudi kule alipotokea. Anzia hapo kusonga mbele, kila kitu kinawezekana" alisema Komba

Awali akitoa salamu za kituo hicho sister Fatima Rani amemshukuru Mhe. Komba kwa kushiriki mahafali hayo pamoja na ushirikiano ambao amekua akikipatia kituo hicho kwa maslahi mapana ya wahanga wa biashara haramu ya kusafirisha binadamu kutokea mikoa mbalimbali nchini

Kuhusu kuwashika mkono wahitimu hao wanapoanza safari yao mpya ya kujitegemea nje ya kituo, Mhe. Komba ametoa rai kwa jamii kushiriki kwenye kuunga mkono shughuli watakazokuwa wanazifanya katika maeneo mbalimbali ya ujasiriamali

Aidha Mhe. Komba amefungua mlango wazi kwa wahitimu hao kujiunga katika vikundi ili waweze kupatiwa mikopo isiyokua na riba katika kundi la wanawake ili kuweza kujikwamua kiuchumi na kujitegemea kiuchumi ili nao kila mmoja akaguse maisha ya mtu mmoja aliyopo mtaani anayepitia changamoto kama walizowahi kupitia wao