KAMATI YA FEDHA YATEMBELEA MIRADI YA MAENDELEO 2025

Posted on: April 17th, 2025

Kamati ya fedha Halmashauri ya Manispaa ya Ubungo ikiongozwa na Mwenyekiti wake Mhe. Jaffar Nyaigesha imefanya ziara ya kukagua na kutembelea miradi mbalimbali ya maendeleo.

Miradi iliyotembelewa ni pamoja na kituo cha uwekezaji cha Afrika Mashariki yaani East African Commercial and Logistics Center (EACLC) uliopo Ubungo Jijini Dar es Salaam na kujionea maendeleo ya ujenzi wa mradi huo.

Uwekezaji unaofanyika katika mradi huo uliopo Manispaa ya Ubungo una thamani ya dola za kimarekani milioni 110 na ni miongoni mwa miradi iliyosajiliwa na Kituo cha Uwekezaji Tanzania (TIC) ndani ya miaka mitatu ya uongozi wa Rais wa Jamhuri ya Muungano wa Tanzania Mhe. Dkt. Samia Suluhu Hassan.

Ujenzi wa mradi huo unahusisha ujenzi wa Kituo kikubwa cha biashara kitakachojumuisha maduka na ofisi 2000 na ulianza kujengwa April, 2023

Katika mradi huo wamewataka wananchi na wafanyabiashara kujitokeza kwa wingi kuchangamkia fursa ikiwemo kuchukua fremu za maduka kwaajili ya shughuli mbalimbali ambapo hadi sasa zaidi ya ofisi 1000 zimeshalipiwa na watanzania.

Miradi mingine ni ujenzi wa kituo cha Afya cha Mpoji Magohe unaojumuisha ujenzi wa jengo la wagonjwa wa nje, na wodi ya mama na mtoto ambayo wameagiza kasi iongezeke na ikamilike kwa wakati.

Aidha kamati hiyo pia imetembelea Ujenzi wa shule ya Sekondari Kulangwa ambayo kutokana na kusuasua kukamilika kwake wameagiza hatua za kisheria zilizochukuliwa na wataalam wa Manispaa ya Ubungo ziendelee kwani mkandarasi ameshindwa kutimiza masharti ya kimkataba.

Kamati hiyo pia imetembelea ujenzi wa Mradi wa Fremu za Maduka unaotekelezwa katika kata ya Manzese na mkandarasi Luvisa investment company limited  mbapo wameagiza wataalam kukaa na mkandarasi ili kujua alipokwama kutokana na ukweli kwamba alitakiwa kukabidhi mradi huo toka Machi 16, 2025

Kamati imeridhishwa na utekelezaji wa baadhi ya miradi ikiwemo kituo cha uwekezaji EACLC na Ujenzi wa Kituo cha Afya Mpiji Magohe na kuzidi kusisitiza uadilifu katika matumizi ya fedha za serikali kwa miradi inayoendelea na kuwataka wataalam kukamilisha kwa wakati kwa manufaa ya umma.