KAMATI YA SIASA MKOA WA DSM YAFURAHISHWA NA MRADI WA DARASA LA KUJIFUNZA TEHAMA KIDIJITALI KATIKA SHULE YA MSINGI TEGETA A

Posted on: May 16th, 2023

Dunia inabadilika kwa kasi katika uwanda wa maendeleo ya sayansi na teknolojia hali inayopeleka kubadilika kwa mifumo mbalimbali ya elimu ikiwemo ufundishaji wa kisasa kupitia vifaa vya kiteknolojia kama kompyuta na vishkwambi.

Hayo yamebainishwa leo Mei 16, 2023 na kamati ya siasa mkoa wa Dar es Salaam iliyofanya ziara ya ukaguzi wa miradi ya maendeleo katika wilaya ya Ubungo na kufanikiwa kutembelea mradi darasa la kidijitaliwa katika shule ya msingi Tegeta A.

Darasa hilo ni miongoni mwa madarasa mawili tu nchi nzima ambapo jingine lipo shule ya sekondari Kimbiji iliyopo Manispaa ya Kigamboni. Aidha mradi huo unasimamiwa na tume ya elimu Tanzania.

Mradi huo umejengwa kwa shilingi milioni 17.5 kupitia mapato ya ndani ya Manispaa ya Ubungo na vifaa vyake vimepatikana kupitia ufadhili wa serikali ya Korea Kusini ambao wametoa vifaa vyote vya TEHAMA ikiwemo kompyuta 25, vishkwambi vya kisasa 20, Flash 50, Printer pamoja na Scanner.

Mradi huo unatarajia kuwapeleka walimu 20 wa somo hilo nchini Korea Kusini kwenda kujifunza zaidi juu ya teknolojia hiyo ili waje wawafundishe kwa ufanisi mkubwa wanafunzi watakaoanza kufundishwa katika somo hilo la TEHAMA

Akiongea katika ziara hiyo mjumbe wa halmashauri kuu ya CCM Taifa ndg. Juma Simba Gadaf ameipongeza Manispaa ya Ubungo kwa ubunifu na usimamizi wa mradi huo

"Teknolojia inakuwa kwa kasi sana duniani hivyo ni muhimu kuanza kuwafundisha watoto wetu juu ya matumizi ya vifaa na teknlojia mbalimbali za TEHAMA ili kuwaandaa kushindana na soko kubwa la ajira kidunia, hongereni sana Ubungo" Alisema

Nae Mkurugenzi wa Manispaa ya Ubungo ndg. Beatrice Dominic ameieleza kamati hiyo kuwa uanzishwaji wa darasa hilo la ufundishaji TEHAMA kidijitali ni mwendelezo wa utekelezaji wa ilani ya CCM (2020 - 2025) katika uboreshaji wa utoaji elimu mashuleni.

Ziara hiyo pia imetembelea ujenzi wa shule mpya ya msingi Kinzudi yenye madarasa 5, hospitali ya wilaya iliyopo Baruti yenye majengo 8 na vifaa tiba vya kisasa, ujenzi wa shule ya sekondari Ubungo pamoja na kutembelea mabanda ya soko la Mabibo Germent