KAMATI YA SIASA MKOA YARIDHISHWA NA UTEKELEZAJI WA MIRADI UBUNGO.

Posted on: January 19th, 2022

Kamati ya Siasa ya Chama cha Mapinduzi (CCM) ikiongozwa na Katibu wa Chama hicho Mkoa wa Dar es salaam Adam Ngalawa imetembelea na kukagua miradi mbalimbali ya maendeleo iliyotekelezwa manispaa ya Ubungo ikiwemo ya ujenzi wa madarasa 151, lengo ikiwa ni kujiridhisha na utekelezaji wa ilani ya chama hicho katika kuwahudumia wananchi wake.  

Akizungumza katika ziara hiyo katibu huyo Adam Ngalawa ameipongeza Manispaa hiyo kwa kuisimamia kikamirifu utekelezaji wa miradi hiyo kupitia fedha za Uviko 19 na mapato ya ndani pia ameeleza kufurahishwa na ujenzi wa shule mpya ya Makabe Sekondari na Ukombozi Sekondari shule ambazo zitaenda kumaliza tatizo la wanafunzi kufuata huduma ya elimu mbali na makazi yao.

“Niwaombe kupitia mapato ya ndani tengeni bajetu ya kukarabati madarasa ya zamani ili yawe na muonekeno mzuri kama hayo ya uviko” alisema Ngalawa.

Aidha, kuhusu kuondoa daraja sifuri (division zero) kwa matokeo ya kidato cha nne Ngalawa amesema Halmashauri iweke mpango wa kuomba wanafunzi wa vyuo vikuu hasa kwa masomo ya sayansi kwa ajili ya kuongeza nguvu katika ufundishwaji wa masomo hayo ambapo kwa sasa idadi ya walimu hao ni ndogo ukiringanisha na mahitaji hali inayopelekea wanafunzi wengi kufeli masomo hayo.

“Tunatamani kuondoa “division zero” Dar es salaam kwani fursa ya kupata walimu katika vyuo vikuu tunayo ili kujenga heshima ya Mkoa na Taifa kwa kuwa na wasomi mahili katika masomo ya sayansi” alisisitiza Ngalawa.

Kwa upande wake Mkuu wa Wilaya ya Ubungo Mhe Kheri James ameeleza kuwa Wilaya kwa kushirikiana na Chuo Kikuu cha St Joseph imeanza kutekeleza azimio la kuongeza ufaulu wa masomo ya sayansi katika shule za Wilaya hiyo ambapo wanafunzi wa chuo hicho wataanza kufundisha masomo ya sayansi katika shule mpya za sekondari ya Makabe na Ukombozi.