KAMATI YA UCHUMI, AFYA NA ELIMU UBUNGO YATEMBELEA MIRADI YA MAENDELEO

Posted on: January 12th, 2024

Kamati ya uchumi, afya na elimu ya Manispaa ya Ubungo leo imefanya ziara ya kutembelea Shule mpya ya Awali na Msingi Kibamba ‘B’ lengo ikiwa ni kukagua ujenzi wa Shule hiyo.

Akiongea katika ziara hiyo Mwenyekiti wa ziara hiyo Mhe. Ismail Mvungi ameipongeza Manispaa ya Ubungo kwa ujenzi wa Shule hiyo ambayo kwa kiasi kikubwa imeenda kupunguza changamoto ya upungufu wa miundombinu ya elimu ndani ya Manispaa hiyo.

Sambamba na hayo Mhe. Mvungi amewataka walimu wa Shule hiyo kufanya bidii katika ufundishaji wa wanafunzi na hivyo kuifanya Shule hiyo mpya kuwa ya mfano juu ya ufaulu wa wanafunzi

Akimuwakilisha Mkurugenzi wa Manispaa hiyo katika ziara hiyo Denis Nyoni amesema uwepo wa Shule hiyo umesaidia kupunguza msongamano kutoka Shule mama iliyopo eneo hilo na hivyo kuwezesha wanafunzi kujifunza kwenye mazingira mazuri na kuongeza ari ya ujifunzaji na ufundishaji.

Utekelezaji wa Mradi wa ujenzi wa Shule hiyo umegharimu kiasi cha shilingi Milioni 400 ambazo ni Fedha kutoka Serikali kuu kwa ajili ya ujenzi wa madarasa 9 ya Msingi, madarasa mawili ya awali, jengo la utawala, matundu 6 ya vyoo ya wanafunzi wa darasa la awali na matunda 16 ya vyoo kwa wanafunzi wa madarasa ya msingi.